Leverkusen á­fram taplaust á toppnum

Leverkusen hafði töluverða yfirburði í leiknum í dag en fyrsta markið kom þó ekki fyrr en í uppbótartíma fyrri hálfleiks þegar hinn hollenski Jeremie Frimpong kom gestunum yfir. Frimpong, sem leikur í stöðu hægri bakvarðar, hefur heldur betur fundið fjölina sína undir stjórn Xabi Alonso og raðar inn mörkunum þessa dagana.

Amine Adli gekk svo nokkurn veginn frá leiknum með marki á 81. mínútu eftir laglegan undirbúning frá Florian Wirtz. Heimamenn náðu þó inn einu huggunarmarki á 86. mínútu, lokatölur 1-2.

Leverkusen er því áfram tryggilega í efsta sæti deildinnar, með 58 stig eftir 22 umferðir. Bayern Munchen er í 2. sæti með 50 stig og eiga leik til góða, en alls eru leiknar 36 umferðir í þýsku úrvalsdeildinni.