Ekkert fær Le­verku­sen stöðvað

Ríkjandi Þýskalandsmeistarar Bayern München unnu ótrúlegan 8-1 sigur í gær, laugardag, og minntu örlítið á sig í toppbaráttunni. Leverkusen missteig sig gegn Qarabag í Evrópudeildinni í vikunni og því var spennandi að sjá hvernig liðið myndi tækla leik dagsins.

Það hjálpaði til að Moritz Jens nældi sér í tvö gul spjöld í fyrri hálfleik og Wolfsburg því manni færri frá og með 28. mínútu. Það nýtti Nathan Tella sér þegar hann skallaði fyrirgjöf Alejandro Grimaldo í netið af stuttu færi, staðan 1-0 í hálfleik.

Hinn gríðarlega efnilegi Florian Wirtz gulltryggði svo sigurinn þegar fjórar mínútur voru til leiksloka, lokatölur 2-0 og Leverkusen komið aftur með 10 stiga forystu á toppi deildarinnar.

Leverkusen er með 67 stig að loknum 25 leikjum. Bayern er með 57 stig eftir jafn marga leiki. Wolfsburg er í 13. sæti með 25 stig.