Ísak Berg­mann og fé­lagar áttu aldrei mögu­leika gegn Le­verku­sen

Leverkusen hefur verið einfaldlega óstöðvandi á leiktíðinni og á Þýskalandsmeistaratitilinn vísan. Þá er liðið komið í 8-liða úrslit Evrópudeildarinnar og nú bikarúrslit eftir sigur kvöldsins.

Gestirnir frá Düsseldorf sáu aldrei til sólar en hægri bakvörðurinn Jeremie Frimpong kom Leverkusen yfir strax á 7. mínútu eftir undirbúning Patrik Schick. Amine Adli tvöfaldaði forystuna á 20. mínútu eftir sendingu frá Florian Wirtz. Stundarfjórðung síðar var svo komið að Adli að leggja upp á Wirtz og staðan 3-0 í hálfleik.

Wirtz bætti við öðru marki sínu og fjórða marki Leverkusen úr vítaspyrnu eftir klukkustundarleik. Staðan orðin 4-0 og reyndust það lokatölur. Ísak Bergmann lék allan leikinn á miðju Düsseldorf.

Ísak Bergmann og félagar eru um þessar mundir í 3. sæti þýsku B-deildarinnar, sex stigum frá 2. sætinu sem fer beint upp í efstu deild. Fari svo að Düsseldorf endi í 3. sæti fer það í umspil við liðið í 16. sæti úrvalsdeildarinnar.