„Við áttum að vinna, það er aug­ljóst“

Það að gera 2-2 jafntefli gegn Manchester United hafa ekki alltaf verið slæm úrslit fyrir knattspyrnustjóra Liverpool, en þegar liðið er í jafn harðri titilbaráttu og nú svíður það líklega extra mikið að tapa tveimur stigum gegn erkifjendunum. Svo ekki sé talað um yfirburði Liverpool í leiknum. Gestirnir áttu 28 skot gegn níu skotum heimamanna og hefðu hæglega getað skorað fleiri en tvö mörk.

„Við áttum að vinna, það er augljóst,“ sagði Klopp í leikslok.

„Við hefðum átt að skora meira en bara eitt í fyrri hálfleik. Þeir áttu ekki eitt skot í fyrri hálfleik og við erum bara 1-0 yfir. Þetta var virkilega vel gert hjá Bruno [Fernandes]. Þá tóku áhorfendur við sér og við þurftum nokkrar mínútur til að finna taktinn aftur, en þá skora þeir annað frábært mark.“

„Við fengum færi fyrir og eftir mörkin þeirra. Eins og ég sé þetta þá erum við með einu stigi meira en fyrir leikinn. Þeir lögðu extra mikið á sig í dag og þannig er það bara. Við munum lenda aftur í því á móti Everton.“

„Ég er ekki reiður út í strákana, en á meðan leik stendur ætla ég ekki að leyfa hlutunum bara að gerast. Við féllum of djúpt niður. Það komu upp fullt af stöðum þar sem við hefðum getað varist betur.“

„Við eigum ekki marga heimaleiki eftir. Það lið sem vinnur deildina þarf að eiga það skilið. Við erum með í titilbaráttunni og ég er sáttur með það.“