Tiger setur met ef hann nær niður­skurðinum á Masters

Ef ekkert kemur upp á næstu daga þá mun Tiger taka þátt í sínu 26. Mastersmóti á ferlinum þegar mótið hefst á fimmtudaginn kemur.

Hinn 48 ára gamli Woods var þarna með kylfusveinunum Lance Bennett um helgina en þeir hafa ekki unnið saman áður á Masters. ESPN segir frá.

Joe LaCava, sem var kylfusveinn þegar Tiger vann Mastersmótið 2019, er nú fastráðinn kylfusveinn hjá Patrick Cantlay. Það var fimmti sigur Tigers á Augusta en alls hefur hann unnið fimmtán risamót.

Tiger setur hins vegar met komist hann í gegnum niðurskurðinn í ár. Það yrði 24. Mastersmótið í röð þar sem hann tryggir sér það að fá að spila á tveimur síðustu dögunum. Metinu deilir hann nú með þeim Gary Player og Fred Couples.

Woods jafnaði metið í fyrra þegar hann náði niðurskurðinum en þá varð hann að hætta á þriðja degi. Keppni tafðist þá vegna mikilla rigninga og á endanum tóku meiðsli sig upp í fæti Woods.

Woods kláraði ekki þegar hann tók þátt í Genesis Invitational mótinu á dögunum. Hann hætti þá vegna veikinda (flensu) en hann var líka að glíma við stirðleika í baki á því móti.

Það er langt síðan golfáhugafólk fékk að sjá Tiger í ham og það bíða því margir spenntir að sjá hvernig gangi hjá honum en mótið verður í beinni á Stöð 2 Sport 4. Útsending frá fyrsta degi hefst klukkan 18.30 á fimmtudaginn. Daginn áður verður sýnt frá Par 3 keppninni en útsendingin frá henni hefst klukkan 18.30 á miðvikudaginn.