Þrátt fyrir að vera aðeins 48 ára eru bestu dagar Tiger að baki en á sínum tíma var hann óumdeilanlega besti kylfingur heims.
Hann hefur undanfarin ár glímt við gríðarlega erfið bakmeiðsli og í kjölfarið verkjalyfjafíkn tengdum meiðslunum. Þá lenti hann í alvarlegu bílslysi árið 2021 sem hann var heppinn að sleppa lifandi frá.
Woods tekur hins vegar þátt í ár og hefur varið heldur nýstárlegar leiðir til þess að vera upp á sitt besta.
Þegar Tiger hefur leik í ár verður það í 26. sinn sem hann tekur þátt á Mastersmótinu í golfi. Hann hefur ekki spilað síðan í febrúar á þessu ári en stefnir á að endurtaka leikinn frá því 2019 þegar hann kom öllum að óvörum og sigraði mótið.
Var það 15. risamótið sem Woods vann á annars glæstum ferli sínum en fara þurfti aftur til 2008 til að finna síðasta sigur Woods á risamóti. Eftir að fara með sigur af hólmi á Opna bandaríska það árið þá barðist Woods við bakmeiðsli, verkjalyfjafíkn sem og ýmis vandamál í einkalífinu.
Hann sneri til baka tímabilið 2012-13, sigraði átta PGA-mót og lyfti sér aftur á topp heimslistans. Það var svo 2017 sem hann fór í fjórðu aðgerðina á baki og eftir það var alls óvíst hvort hann gæti einhvern tímann keppt aftur á hæsta stigi, hvað þá barist um titla.
Aðeins ári síðar var hann mættur í harða barátta um titilinn á PGA-meistaramótinu og svo á Augusta-vellinum 2019 gerði hann hið ómögulega. Nú fimm árum síðar vonast hann til að endurtaka leikinn og vinna það sem yrði án efa hans stærsti sigur á ferlinum.
Mótið verður í beinni á Stöð 2 Sport 4. Útsending frá fyrsta degi hefst klukkan 18.30 á fimmtudaginn. Daginn áður verður sýnt frá Par 3 keppninni en útsendingin frá henni hefst klukkan 18.30 á miðvikudaginn.
