Læknir lang­þreyttur á skrif­finnsku: „Mér líður oft eins og Indriða í Fóst­bræðrum“

Indriði birti svo í gær á Facebook-síðu sinni lista með dæmum um vottorð sem hann hefur þurft að skrifa síðustu mánuði, til að sýna fram á það hversu bogin staðan er. Fjölmargir hafa deilt færslunni, þar á meðal læknar.

„Ég var, eins og oft áður, að vinna langt fram á kvöld í gær við að skrifa vottorð. Tölvukerfið hrundi svo reglulega og ég fékk bara nóg að þessu pappírsfargani,“ segir Indriði og að allt of mikill tími af hans vinnudegi fari í þessa vinnu.

Læknisvottorð fyrir fótbrotið barn

Hér að neðan eru nokkur dæmi um það sem Indriði hefur þurft að votta:

-Ég votta reglulega til félagsþjónustunnar að einstaklingur sé óvinnufær og óendurhæfingarfær vegna fíknivanda eða andlegs/líkamlegs sjúkdóms. Stundum biðja þeir um vottorðið á 2-3 mán fresti þrátt fyrir að allir vita að ástandið er óbreytt.

-Ég hef gert vottorð vegna veikinda í prófum í háskóla, stundum þurft tvö eða þrjú mismunandi skólavottorð fyrir mismunandi próf í sömu veikindunum.

- Ég var beðinn um leikfimisvottorð fyrir barn sem hafði brotnað í íþróttum og var í gipsi. Greinilega eru allir blindir á þetta gips nema læknirinn ég. Ég neitaði vottorðinu.

„Ef viðkomandi er í hjólastól eða með gips eða það er augljóslega eitthvað að. Af hverju þarf ég að gera vottorð? Mér líður oft eins og Indriða í Fóstbræðrum. „Á ég að gera það?“. Ég fær þessa tilfinningu reglulega. Svo bara sauð á mér í gærkvöldi og ég birti þennan lista “ segir Indriði og heldur áfram.

„Tryggingarstofnun samþykkir eiginlega aldrei endurhæfingarvottorð frá læknum nema tvo mánuði í senn. Fólk þarf að koma því mjög reglulega til mín til að fá endurnýjun eða til að endurnýja lyfjaskírteini. Svo eru það sjúkraþjálfunarvottorðin. Fólk þarf að koma til mín einu sinni á ári til að endurnýja vegna vandamála sem eru samt alltaf þau sömu. Svo eru það beiðnir frá talmeinafræðingum sem eru það nýjasta,“ segir Indriði.

Ekki menntaður talmeinafræðingur

Það komi beiðni frá talmeinafræðingi, sem sé búinn að meta eitthvað barn, en matið sé ekki formlegt fyrr en hann sé búinn að votta það.

„Ég hef ekki fengið neina þjálfun við mat eða meðferð á talþroska barna en samt á ég að gera vottorð fyrir slíkt. Mér finnst þetta fyrir neðan allar hellur. Það þarf að breyta þessu. Ég vil frekar fá fleiri sjúklinga,“ segir Indriði.

Hann segir að til viðbótar við vottorðin bætist svo Heilsuvera og ný lyfjakort.

„Þetta er bara ástæðan fyrir því að margir kollegar eru að lenda í kulnun. Við erum að lenda á skriffinnskublokkum.“

Hér að neðan eru fleiri dæmi um vottorð sem Indriði hefur verið beðinn um að gera:

- Einu sinni sendi ég barn á Landspítalann til mats á sjúkdómi. Svo var hringt í mig daginn eftir og ég beðinn að gera tilvísun brátt því barnið var kominn á skurðarborðið á Hringbraut og móðirin myndi ekki fá niðurgreidda skurðaðgerðina ef heilsugæslulæknirinn í Hafnarfirði gerði ekki tilvísun.

- Ég gerði fyrir einn og sama sjúklinginn örorkuvottorð til TR, örorkuvottorð til lífeyrissjóðs, hjálpartækjabeiðni, bílastæðakort, endurnýjun á 10 lyfseðlum, lyfjaskírteini og beiðni í sjúkraþjálfun í bókaðan 20 mínútna tíma. Flest af þessu hafði hann fengið þetta endurnýjað 1-2 árum áður, en það þurfti víst að votta aftur að sjúklingurinn væri með ennþá með mænuskaða og í hjólastól. Þetta tók mig lengur en 20 mínútur.

- Ég endurnýja sömu sjúkraþjálfarabeiðnina sem sjúklingur hafði fengið í 10 ár í röð fyrir sama bakverkjavandanum. Ctrl-C (copy) og Ctrl-V (paste) eru vinir mínir.

- Byssuleyfisvottorð eru sérstök. Það eru engir verkferlar, reglugerðir eða gæðastaðlar hvað skal gera í veitingu byssuleyfisvottorðs. Samviskunnar vegna fletti ég allri sjúkraskrá viðkomandi upp, skoða lyfjagagnagrunn 7 ár aftur í tímann, skoða sjón og mæli blóðþrýsting, en ég gæti líka bara sleppt því og klárað þetta á 2 mínútum.

- Dæmi um vottorð sem ég hef gert: Kafaravottorð, þjálfaravottorð, skólaferðalagsvottorð, skiptinámsvottorð. Sumt viðeigandi, önnur algjörlega tilgangslaus.

- Dæmi um vottorð sem ég hef neitað; hnefaleikavottorð. Á að votta það að þú megir kýla þig/aðra í klessu? Uh, þú þarft ekkert vottorð uppá það.