Frábær stemming hjá Bylgjulestinni í Eyjum um helgina

Bylgjulestin 3. júní 2024 15:27

Þau Bragi Guðmunds og Kristín Ruth stýrðu Bylgjulestinni um helgina. Fyrsta stopp sumarsins var í Vestmannaeyjum og mætti Gísli formaður Sjómannadagsráðsins í spjall.

Bylgjulestin kom sér fyrir á hinu glæsilega Vigtartorgi við höfnina í Vestmannaeyjum um liðna helgi. Fjölmenni var á torginu enda matarvagnar allt um kring og þrátt fyrir að sólina vantaði var virkilega góð stemmning eins og venjan er hjá heimafólki og gestum sem lögðu leið sína út í eyjuna.

„Eyjafólk byrjar Sjómannadags helgina reyndar á fimmtudeginum og er mikið lagt upp úr því að öll skip og bátar séu i landi þessa helgina, en það var frábær dagskrá þegar við vorum þarna á laugardeginum niðri á bryggjunni: Kappróður, koddaslagur, tuðrukvartmíla og margt fleira. Þarna voru líka hoppukastalar og foosballvöllur,“ segir Bragi Guðmunds, lestarstjóri Bylgjulestarinnar.

„Í Bylgjubílinn kom Gísli formaður Sjómannadagsráðsins í eyjum og sagði okkur frá þessari frábæru dagskrá alla helgina en svo leit Íris Róbertsdóttir við og sagði okkur frá mikilvægi Sjómannadagsins fyrir bæjarbúa og ekki síður frá laugardeginum fyrir sem er sömuleiðis merkilegur.

Kolbeinn Agnarsson formaður Jötuns Sjómannafélags kom og sagði okkur frá sögu Sjómannadagsins í Eyjum og svo mættu þeir Sæþór Vídó og Jarl Sigurgeirsson með gítarana og töldu í létta sjómannasyrpu,“ segir Bragi.

Bylgjan gaf þeim sem fyrstir komu glaðning í poka, Nóa kropp, appelsín, Muna buff og glaðning frá Bylgjunni. Rétt hjá, á Kiwanisplaninu var svo bílasýning frá bílaumboðinu Öskju.

Um næstu helgi fer Bylgjulestin á hina árlegu Prjónagleði á Blönduósi.