Erika Nótt heldur leyndar­málinu þétt að sér fyrir kvöldið stóra

Óhætt er að segja að mikil spenna ríki fyrir Icebox sem hefur fest sig rækilega í sessi sem árlegur og stór íþróttaviðburður hér á Íslandi. Búast má við því að hvert sæti verði þétt skipað í Kaplakrika.

Á aðalhluta kvöldsins eru á dagskrá fimm bardagar þar sem að hnefaleikafólk frá Íslandi mætir hnefaleikafólki frá Noregi. Erika Nótt, sem varð Norðurlandameistari í hnefaleikum fyrr á árinu er ein þeirra sem stígur inn í hringinn. Hún þekkir það vel að keppa fyrir Íslands hönd og gerir það enn á ný á morgun

„Mér líður ótrúlega vel og í sannleika sagt held ég að mér hafi aldrei liðið jafn vel haldandi inn í bardaga á Icebox,“ segir Erika Nótt. „Við erum auðvitað nýkomin aftur til Íslands frá Írlandi þar sem að við vorum í æfingabúðum. Þannig að undirbúningurinn hefur verið mjög góður og mér er búið að líða ótrúlega vel.Þetta eru alveg sex vikur sem maður hefur varið í undirbúning fyrir þetta kvöld. Þrjár til sex vikur af morgunæfingum og sprettum og svo fengum við náttúrulega að halda í þessa Írlandsferð.

Erika Nótt og fleira íslenskt hnefaleikafólk hélt til Írlands á dögunum þar sem æft var við bestu aðstæður við Crumlin hnefaleikafélaginu undir stjórn hins margreynda þjálfara Phil Sutcliffe sem er meðal annars hnefaleikaþjálfari Conor McGregor sem er án efa stærsta nafnið í heimi bardagaíþróttanna um þessar mundir

„Þar gat ég æft með og reynt á mig á móti nokkrum af fremstu hnefaleikakonum Írlands. Það var frábær reynsla fyrir mig og eitthvað sem var mjög kærkomið. Þar var ég að æfa með sex mismunandi hnefaleikakonum sem standa mjög framarlega. Það æfa varla sex stelpur hnefaleika hér heima á Íslandi. Þetta var því mjög gott.“

Erika þekkir það vel að keppa í hnefaleikum fyrir Íslands hönd og varð hún, eins og tæpt var á hér ofar í greininni, Norðurlandameistari í greininni fyrr á árinu. Segja má að Erika muni einnig keppa fyrir Ísland í kvöld en líkt og aðrir íslenskir hnefaleikakappar á Icebox mætir hún norskum andstæðingi.

„Að ná að gera eitthvað svona fyrir Ísland. Eins og að vinna Norðurlandamótið. Eitthvað sem Íslendingur hefur aldrei gert áður í hnefaleikum. Það er ótrúlegt að ná að gera eitthvað svona fyrir landið. Það verður svipuð tilfinning sem að umlykur mann í kvöld. Við erum að einhverju leiti fulltrúar Íslands í hringnum. Það er svo geggjuð tilfinning sem því fylgir.“

Stemningin á ICEBOX sé engri lík.

„Ég elska stemninguna á Icebox. Ég hef aldrei keppt á bardagakvöldi þar sem að er jafnmikil stemning og á Icebox. Ég er með geggjað plan í höndunum. Meira að segja fyrir gönguna í átt að hringnum. Ég tek því ekki af einhverri léttúð. Ég er bara ótrúlega spennt fyrir kvöldinu. Stemningin peppar mig ekkert eðlilega mikið.“

Það er væntanlega bara háleynilegt hvað þú ætlar að bjóða upp á í göngu þinni í hringinn?

„Algjört leyndarmál. Það verður ekkert djók.“

En hvernig kom það til að Erika Nótt færi að æfa hnefaleika?

„Ég æfði fullt af íþróttum þegar að ég var yngri. Fimleika og dans til að mynda en fann mig einhvern veginn aldrei í því. Ég prófaði hnefaleika. Var nú ekki góð að boxa til að byrja með en fannst þetta svo ótrúlega gaman. Það voru ekki margir að æfa þessa íþrótt og hún var kannski ekkert það þekkt á Íslandi á þeim tíma. Þetta er bara svo ótrúlega gaman. Ég bjóst ekki við því fyrir sex eða sjö árum síðan að þetta væri það sem að ég væri að stunda daginn út og inn. En hér er ég. Ég elska þetta.“

Sýnt verður frá aðalhluta ICEBOX hnefaleikakvöldsins í Kaplakrika í beinni útsendingu á Stöð 2 Sport 5 og hefst útsendingin klukkan níu í kvöld.