Hamilton hrósar Schumacher fyrir að koma út úr skápnum

Fyrr í vikunni greindi Schumacher, sem vann sex Formúlu 1 keppnir á ökumannsferlinum, frá því að hann væri samkynhneigður.

Hamilton, sem er sigursælasti ökuþór í sögu Formúlu 1 ásamt Michael Schumacher, eldri bróður Ralfs, sagði að Þjóðverjinn hefði tekið stórt og hugrakkt skref með því að koma út úr skápnum. Allir innan Formúlu 1 vissu þó að Schumacher væri samkynhneigður.

„Hann hefur klárlega ekki átt auðvelt með að segja frá þessu í fortíðinni. Þetta er ekki nýtt af nálinni,“ sagði Hamilton fyrir ungverska kappaksturinn um helgina.

„En þetta sýnir að við erum loksins komin á þann stað að geta tekið skref sem þetta óttalaust. Hingað til hefur hann bara fengið jákvæð viðbrögð frá fólki í Formúlu 1 og vonandi getur hann sagt að það sé vegna tímanna sem við lifum á núna og breytinganna sem hafa átt sér stað.“

Enn mikið verk óunnið

Hamilton segir þó að Formúla 1 eigi enn talsvert í land þegar kemur að málum annarra en gagnkynhneigðra karla.

„Það er eitt að segja að við tökum öllum með opnum örmum og annað að sjá til þess að fólki líði vel í aðstæðum,“ sagði Hamilton.

„Þetta er karlasport og við vitum ekki betur en að hann sé einn af þeim fyrstu til að koma fram svona opinberlega. Við tökum öllum opnum örmum innan liðsins en íþróttin þarf að gera meira til að fólki líði vel, til að konum finnist þær vera velkomnar því við vitum að það hefur ekki alltaf verið komið vel fram við þær á þessum vettvangi. Við getum klárlega gert betur.“

Hamilton, sem ekur fyrir Mercedes, er í 8. sæti í keppni ökuþóra á þessu tímabili í Formúlu 1.