„Var kominn með haus­verk á hliðar­línunni“

„Tilfinningin er mjög góð. Þetta var erfiður leikur. Við náum góðu forskoti 2-0, fórum með það í hálfleik en svo svara þeir 2-1 fullsnemma fyrir minn smekk. Manni leið ekkert alltof vel í seinni hálfleik. Við náum að þrauka þetta. Kredit á strákana. Við vorum helvíti laskaðir komandi inn í þennan leik. Bara frábært hvernig sjúkraþjálfarateymið náðu að tjasla mönnum saman. Menn fundu kraft og styrk til að komast í gegnum þetta,“ sagði Arnar við íþróttadeild í morgun.

Víkingur leiddi 2-0, líkt og hann segir, en Flora minnkaði muninn á 53. mínútu. 2-1 var staðan allt til loka en heimamenn pressuðu nokkuð stíft á Víkinga. Arnari var ekki alveg sama á lokakaflanum.

„Ég er ekki að grínast. Þetta eiga að vera 45 mínútur þessir hálfleikar en þegar staðan er svona og mikið undir líður þér eins og þetta séu tveir klukkutímar. Þú þarft bara að treysta á að strákarnir fari eftir strúktúr og taki varnarleikinn alvarlega. Sem betur fer hélst einbeitingin mest allan seinni hálfleikinn,“ segir Arnar.

Hann er þá ánægður með hugarfar sinna manna. Margir þurftu að leysa hlutverk sem þeir eru óvanir eftir því sem leið á.

„Eftir að við náðum að breyta í fimm manna vörn fannst mér komast betri bragur á okkur. Ég er ánægður með hugarfarið. Ég var að biðja suma leikmenn að spila stöðu sem þeir eru alls ekki vanir að spila. Helgi fór í vængbakvörð, eitthvað sem hann er alls ekki vanur. Menn þurfa að fórna sér fyrir málstaðinn,“ segir Arnar.

Meiðslabras á hópnum

Líkt og Arnar nefnir að ofan er töluvert um meiðsli hjá Víkingum. Einhverjir sneru aftur í liðið í gær en fæstir þeirra sem eru að stíga upp úr meiðslum gátu spilað mikið.

„Jón Guðni [Fjóluson] kemur inn þegar tuttugu mínútur eru eftir. Hann var ekki alveg tilbúinn til að byrja leikinn. Við gátum ekki byrjað með leikmenn sem voru tæpir að spila leikinn yfirhöfuð.  Elli [Erlingur Agnarsson] kemur inn á í fyrri hálfleik sem er alltof snemmt fyrir hann,“

„Niko [Nikolaj Hansen] náði að þrauka í einhverjar 55 mínútur. Þetta var mikið púsluspil einhvern veginn. Ég var kominn með hausverk á hliðarlínunni hvernig átti að púsla þessu öllu saman,“ segir Arnar.

Myndin sem var máluð upp í vor

Næst er leikur við ÍA á mánudag í Bestu deildinni áður en Víkingur mætir Santa Coloma frá Andorra í fyrri leik liðanna í umspili um sæti í riðlakeppni Sambandsdeildarinnar í Víkinni á fimmtudag. Nú reyni á að menn setji fullan fókus á deildarleikinn sem fram undan er, þrátt fyrir að við taki tveir leikir sem ákvarða hvort Víkingur fari í riðlakeppni í Evrópu í fyrsta sinn.

„Menn fara kannski að forgangsraða í hausnum. Að einn leikur sé mikilvægari en annar. En Skaginn er strax á mánudaginn og hún hefur gengið fínt, þessi törn milli Evrópuleikja. Við unnum HK, áttum góðan leik við FH og svo fínasti leikur við Vestra. Við þurfum bara að taka góða endurheimt þessa daga og finna kraft á móti Skaganum. Við erum bara með þriggja stiga forskot í deildinni svo við megum ekki missa sjónar af því,“

„Þetta er myndin sem við máluðum í upphafi tímabilsins. Það er ekki hægt að kvarta loksins þegar maður kemst í þessa stöðu. Þá er ekki hægt að skipta um skoðun og kvarta yfir því að þetta sé erfitt. Þetta er vissulega erfitt en þetta er líka ótrúlega gaman,“ segir Arnar.