Enginn hvati fyrir fyrir­­­tæki til að endur­­vinna

Í tilkynningu á vef félagsins segir að nú sé enginn fjárhagslegur hvati fyrir fyrirtæki að skila útrunnum matvælum í umbúðum inn til jarðgerðar. Nú kostar móttakan jafn mikið og móttaka á óflokkuðum úrgangi. 

„Gjald fyrir móttöku matvæla í umbúðum til jarðgerðar var í byrjun síðasta árs 37,4% lægra en gjald fyrir móttöku óflokkaðs úrgangs til brennslu en hefur frá áramótum verið það sama. FA bendir í erindi sínu á að þessi breyting dragi augljóslega úr hvata fyrirtækja til að taka umhverfis- og loftslagsvænni kostinn og koma útrunnum matvælum í jarðgerð,“ segir í tilkynningunni. 

FA hvetur Sorpu til að gera breytingar á gjaldskrá sinni og veita fyrirtækjum hvata til að velja að endurvinna matvælin fremur en að henda þeim með öðru óflokkuðu sorpi.