Hrepptu gullið annað árið í röð í Buffalo

„Við erum með fjóra bikara í farteskinu eftir helgina og vitum eiginlega ekki hvernig við eigum að koma með þá heim,“ segir Justin Shouse hlæjandi í samtali við Vísi. Þeir félagar hafa um nokkurra ára skeið rekið vængjastaðinn Just Wingin' It og er hann nú á þremur stöðum, í Garðabæ, Reykjavík og í Reykjanesbæ.

Í ár unnu þeir félagar meðal annars til aðalverðlauna hátíðarinnar fyrir besta vænginn, fyrir Honey Badger vænginn. Justin segir að undanfarið hafi verið boðið upp á hann á veitingastöðum þeirra félaga án þess þó að hann sé að finna á matseðlinum. Það er ekki ofsögum sagt að Justin sé í skýjunum með árangurinn.

„Þetta er náttúrulega þvílíkur heiður. Við höfðum tekið eftir því að þessi sósa var gríðarlega vinsæl heima, oft var þetta meðal efstu fimm vinsælustu sósanna sem við bjóðum upp á að degi loknum og það þrátt fyrir að hún sé ekki einu sinni á matseðlinum,“ segir Justin sem þekktur er fyrir einstakt viðmót sitt og hressleika.

Minnir á brauðsneiðina frá mömmu

Hátíðin í Buffalo er sú stærsta í heimi. Þangað mæta veitingamenn úr öllum heimshornum, bæði innan og utan Bandaríkjanna. Þeir félagar unnu sömuleiðis til verðlauna í þremur öðrum flokkum: Fyrir frumlegustu sætu sósuna (e. Creative Sweet) en hana hrepptu þeir fyrir French Toast sósuna. Þá hrepptu þeir gullverðlaun fyrir bestu stemninguna í kringum básinn (e. Festival Spirit Award) og svo silfurverðlaun í flokki svokallaðra þurra sósa (e. Best Dry Rub) fyrir Lemon Pepper Cajun sósuna.

„Ég var sérstaklega hreykinn af French Toast verðlaununum, þó ég sé auðvitað himinlifandi með þetta allt saman,“ segir Justin. Ástæðuna segir hann þá að sósan minni helst á brauð sem mamma hans hafi alltaf gert fyrir hann í æsku og það sem hann gerir nú fyrir börnin sín.

„Það var mikill áhugi á sósunni hjá okkur líka sem kom skemmtilega á óvart,“ segir Justin sem segir ljóst að hróður hennar hafi borist alla leið til Buffalo. Hún hafi óvænt orðið afar vinsæl eftir að hafa slegið í gegn á túristasíðu þar sem ónefndur túristi hrósaði henni í hástert.

„Þetta ferðalag hefur verið draumi líkast. Maður er náttúrulega fyrst og fremst þakklátur starfsfólkinu okkar, sem heldur þessu gangandi á hverjum degi á þremur stöðum en líka vinum okkar hér í Bandaríkjunum og víðar sem sjálfir eru að reka svona staði og hafa hjálpað okkur mikið undanfarin ár,“ segir Justin að lokum.