FIA tók fyrir kvörtun Red Bull og hefur kveðið upp dóm sinn

McLaren hefur verið á mikilli siglingu upp á síðkastið í Formúlu 1 og leiðir sem stendur stigakeppni bílasmiða með tuttugu stigum meira en ríkjandi heimsmeistarar Red Bull Racing. 

Bíll McLaren var sá hraðasti í braut í Azerbaijan kappakstrinum í Baku um síðastliðna helgi þar sem að Oscar Piastri, ökuþór liðsins, stóð uppi sem sigurvegari. Liðsfélagi hans, Lando Norris, vann sig þá úr fimmtánda sæti upp í það fjórða. 

Myndbandsupptökur frá kappakstrinum varpa ljósi á það hvernig afturvængurinn á bíl McLaren sveigist upp á við á beina kafla brautarinnar sem er með þeim lengstu í mótaröðinni. 

Ákveðið regluverk gildir í Formúlu 1 um hina ýmsu hluta Formúlu 1 bílsins og hvernig þeir mega virka en það er síðan endur liðunum og hönnunarteymi þeirra komið að vinna innan þess regluverks og er það gert á ýmsa vegu. 

FIA tók kvörtun keppinauta McLaren til greina og hefur nú greint frá því að afturvængur McLaren bílsins hafist staðist alla skoðun. 

Enn fremur segist sambandið vera að skoða öll gögn og að mótvægisaðgerðir varðandi framtíðarútfærslu afturvængins verði íhugaðar.

Talsmenn McLaren, starfsmenn liðsins sem og ökuþórar hafa haldið því fram síðan að bera fór á efasemdaröddum varðandi lögmæti afturvængsins að hann sé löglegur. 

Eins og fyrr segir er það McLaren sem leiðir stigakeppni bílasmiða og þá hefur Lando Norris, ökuþór liðsins, nálgast ríkjandi heimsmeistarann Max Verstappen í stigakeppni ökuþóra. Bilið milli þeirra stendur nú í 59 stigum og hefur verið að dragast saman smátt og smátt eftir því sem líður á tímabilið. 

Næsta keppnishelgi Formúlu 1 hefst með fyrstu æfingum í Singapúr á morgun. Sjálfur kappaksturinn fer síðan fram á sunnudaginn kemur og verður sýndur í beinni útsendingu á Vodafone Sport rásinni.