Samið um lok um­fangs­mikils verk­falls hafnar­verka­manna

Tugir flutningaskipa biðu í röðum fyrir utan hafnir í gær þar sem ekki var hægt að afferma þau vegna umfangsmesta verkfalls hafnarverkamanna í Bandaríkjunum í áratugi. Verkamennirnir lögðu niður störf á sunnudag.

Bráðabirgðasamkomulag sem deiluaðilar gerðu í nótt felur í sér launahækkanir upp á 62 prósent á næstu sex árum, að sögn Reuters-fréttastofunnar. Það er engu að síður nokkuð undir kröfum stéttarfélagsins sem vildi 77 prósent hækkun. 

Núverandi kjarasamningur verður framlengdur fram í janúar á meðan samið er um önnur mál. Það helsta er andstaða hafnarverkamanna við aðgerðir til þess að auka sjálfvirkni sem þeir óttast að fækki störfum fyrir manneskjur af holdi og blóði.

Verkfallið hafði ekki veruleg áhrif á starfsemi íslensku skipafélaganna á meðan á því stóð. Í skriflegu svari frá Samskipum við fyrirspurn Vísis kom fram að fyrirtækið hefði undirbúið sig vel og beint flutningum sínum til annarra hafna sem verkfallið náði ekki til. Eimskip segja að verkfallið hafi ekki haft nein áhrif á siglingar félagsins til Portland í Maine á austurströndinni.

Óttast var að það gæti tekið vikur eða jafnvel mánuði að vinna upp raskanirnar á vöruflutningum ef verkfallið drægist á langinn. Í millitíðinni hefði þá mögulega þurft að sigla flutningaskipum þúsundir kílómetra til vesturstrandar Bandaríkjanna, líklega í gegnum Panamaskurðinn. Við það hefði flutningskostnaður stóraukist og afhendingartími lengst verulega.