„Verð hálf abbó þegar steggjamyndböndin eru sýnd“

Ævintýraferðir ekki bara fyrir strákana

Þær lifa báðar og hrærast í hreyfingu og hefur það lengi verið draumur þeirra að skipuleggja hreyfi-og ævintýraferðir fyrir konur sem þær hafa nú loksins kýlt á.

„Það eru ekki bara strákarnir sem eru að fara í ævintýraferðir heldur konurnar líka. Hreyfiferðir hafa verið mjög vinsælar hér á Íslandi síðustu ár og okkur fannst vera pláss fyrir hreyfiferð sem myndi blanda saman lúxus, hreyfingu, upplifun, dekri og leikgleði. Við höfum stundum grínast með það að hingað til höfum við sjálfar kannski ekki verið þær fyrstu til að bóka okkur í skipulagðar ferðir. 

Þess vegna langar okkur sérstaklega til þess að búa til ferð sem við sjálfar myndum vilja fara í á sama tíma og við vonumst eftir því að það séu fleiri konur á svipuðum stað og við. Sjálfstæðar konur með margvísleg áhugamál sem eru jafnvel vanar að ferðast mikið og þannig fullfærar um að græja skemmtilegar ferðir sjálfar með fólkinu sínu en hefðu gjarnan áhuga á að skella sér í ferð sem væri alvöru frí fyrir uppteknar konur.“

Kærkomið frí frá vaktinni

Lilja er einka- og liðleikaþjálfari og Unnur María með jógakennararéttindi. 

„Við erum báðar mikið fyrir að hreyfa okkur á fjölbreyttan hátt og finnst okkur mikilvægt að tvinna inn skemmtilegri hreyfingu í svona ferð. Við byrjum því flest alla morgna á léttu hreyfiflæði, styrk & liðleika ásamt Yin Yoga í bland. 

Stefnan er að sjálfsögðu sett á að öll hreyfing sé undir berum himni en það er að sjálfsögðu engin skylda að taka þátt í öllu.“

Ferðin verður í lok maí í Króatíu og segja þær að umhverfið sé algjört draumur. Hér má finna nánari upplýsingar um það. 

„Við viljum gefa nútíma ofurkonum frí frá vaktinni. 

Að konur geti mætt í ferð þar sem þær þurfa ekki að skipuleggja neitt frekar en þær vilja, þar sem búið er að setja upp dagskrá sem inniheldur skemmtilega fjölbreytta afþreyingu í bland við rólegheit og lúxus. Það verður að vera smá stuð með, Padel og fleira skemmtilegt.“

„Abbó“ út í steggjamyndbönd

Þær segja að uppleggið sé fyrst og fremst að svitna aðeins og hlæja meira áður en haldið er út í ævintýri dagsins.

„Ég hef svo oft verið í brúðkaupum þar sem ég verð hálf abbó þegar steggjamyndböndin eru sýnd, þeir eru alltaf að gera eitthvað skemmtilegt. Án þess að gera lítið úr gæsunum okkar kvenpeningsins þá erum við gjarnan í aðeins rólegri uppátækjum,“ segir Lilja og Unnur tekur undir.

„Við munum stunda hreyfing og jóga og fara í heilsulind en við viljum við líka skapa ævintýri og ógleymanlegan minningar fyrir konurnar þannig að það verður ýmislegt spennandi í boði, fjórhjólaferð með mögnuðu útsýni, siglingar, hjólaferðir, stuð á ströndinni, menningarferðir, náttúrufegurð og margt fleira.“

Þær segja að lokum mikilvægt að halda í leikgleðina í lífinu.

„Með öllu því sem fylgir lífsins amstri höfum við margar mögulega ekki gefið okkur tíma til þess að rækta þennan part af okkur. Okkur langar því til þess að gefa konum færi á að finna leikgleðina, fíflast og skemmta sér.“