Svona verður Ver­stappen heims­meistari í borg syndanna

Ver­stappen vann sig upp úr sex­tánda sæti upp í það fyrsta í Brasilíu og hafði þar betur gegn helsta sam­keppnisaðila sínum um heims­meistara­titil ökuþóra, Lando Norris hjá McLaren.

Sigur Ver­stappen sér til þess að hann getur komið í veg fyrir alla mögu­leika Norris á því að verða heims­meistari og þar með tryggja sér sjálfur heims­meistara­titilinn sem yrði hans fjórði á ferlinum og sá fjórði í röð.

Hollendingurinn er nú með sex­tíu og tveggja stiga for­ystu á Norris í stiga­keppni ökuþóra og að há­marki átta­tíu og sex stig eru í pottinum fyrir hvern og einn ökuþór frá þessum tímapunkti til loka tímabils. Tuttugu og sex stig er hægt að fá að há­marki á hverri keppnis­helgi af þeim þremur sem eru eftir að viðbættum að hámarki átta stigum úr sprettkeppni sem er hluti af keppnishelgi Formúlu 1 í Katar.

Til þess að Ver­stappen geti tryggt sér heims­meistara­titilinn í Las Vegas mun hann þurfa að sjá til þess að bilið milli sín og Norris standi í sex­tíu stigum eða meira að keppni lokinni og að því mark­miði eru nokkrar leiðir.

Ver­stappen verður heims­meistari ef hann endar kapp­aksturinn í Las Vegas á undan Norris. Fari svo að báðir ökuþórar myndu enda fyrir utan stigasæti yrði Ver­stappen einnig meistari.

Þá gæti Ver­stappen orðið heims­meistari þrátt fyrir að enda neðar en Norris í keppninni en mætti ekki tapa meira en tveimur stigum á Bretann.