Opnar sig um brjál­æðið á Skaganum: Fékk á­fall og átti erfitt með svefn

Skagamenn héldu að þeir hefðu skorað sigurmark í leiknum við Víking á 94. mínútu leiksins, þegar staðan var 3-3. Markið var dæmt af vegna meints leikbrots Skagamanna, sem voru æfir þegar dómurinn féll. Víkingar geystust í kjölfarið upp í sókn, skoruðu og unnu leikinn 4-3.

Sigur Víkinga var þeim mikilvægur í toppbaráttunni á þeim tímapunkti, en þeir töpuðu hreinum úrslitaleik um titilinn fyrir Breiðabliki. Tap Skagamanna þýddi hins vegar að þeir voru úr baráttunni um Evrópusæti.

Jón Þór Hauksson, þjálfari ÍA, fékk að líta rautt spjald fyrir mótmæli undir lok leiks og var dæmdur í bann, auk þess að greiða sekt, fyrir ummæli sín og framkomu eftir leik.

Væri ekki villa í körfubolta

Elías Ingi, sem dæmdi markið af ÍA, var gestur í útvarpsþættinum Fótbolti.net á X977 í dag. Þar ræddi hann dóminn afdrifaríka við þá Elvar Geir Magnússon og Tómas Þór Þórðarson.

„Ákvörðunin að ég taki markið af er vegna þess að ég sé brot. Ég sé leikmann ÍA hlaupa inn í leikmann Víkings. Það leiðréttist ekkert í hausnum á mér fyrr en ég er kominn heim til mín og horfi á atvikið aftur í símanum mínum. Þá bara fæ ég áfall,“ segir Elías Ingi og bætir við:

„Þetta er hræðilegur dómur og það sjá það allir sem horfa á endursýninguna. Ég er í eðlilegri stöðu á miðað við dómara í leik og hvað er að gerast í leiknum en fæ hræðilegt sjónarhorn af því sem gerist inn í teignum og dæmi út frá því (...) Þetta hefði ekki einu sinni átt að vera villa í körfubolta,“ segir Elías Ingi.

Sögur fóru af látum Skagamanna eftir leik og að menn hafi reynt að ráðast inn í dómaraklefann. Elías Ingi kveðst skilja gremju Skagamanna, þó það þurfi vitaskuld að vera ákveðin mörk.

„Þú þarft að fara ansi langt til að reyna að ráðast inn í klefa eða sparka í hurðar. En ég skil viðbrögðin, það er verið að taka af þér fullkomnlega löglegt mark. Og þetta er ekki mark á þriðju mínútu í þriðju umferð. Þetta er risastórt. Auðvitað skil ég það, þetta er risastórt,“ segir Elías Ingi.

„Ég náttúrulega veit ekkert hvernig þetta var frammi því hurðin var lokuð. En við heyrðum þegar var verið að banka og berja,“ segir Elías um það sem gekk á eftir leik á Skaganum.

Kallaður öllum illum nöfnum

Atvikið átti sér svo eftirmála þar sem ósáttir aðilar höfðu samband við Elías Inga eftir leik.

„Það voru send allskonar skilaboð. Sem á ekki að vera hluti af þessu. Það var töluverður fjöldi aðila sem hafði eitthvað vantalað við mig. Fólk sem ég þekkti ekki neitt. Þetta voru ekki hótanir. Ógeð og aumingi og trúður og allt þar fram eftir götunum,“ segir Elías Ingi.

Átti erfitt með svefn

Elías kveðst þá hafa þurft töluverðan tíma til að jafna sig eftir atvikið.

„Þetta er gríðarlegt högg. Mitt markmið þegar ég fer inn á fótboltavöllinn er að reyna að vera á pari við leikmenn eða betri. Ég vil vera frábær þegar ég er inni á velli. Það gekk oft vel í sumar. En þetta atvik er náttúrulega bara skelfilegt,“

„Eins og ég segi, þegar ég kem heim og horfi á þetta þarf ég bara að sjá þetta einu sinni og sé að þetta er ömurlegur dómur. Þá kemur bara sjokk. Það varði í töluverðan tíma. Það var erfitt að sofa, ég einbeiti mér ekkert í vinnunni í næstu daga. Þetta vill enginn. Þú vilt gera vel og vera ekki í umræðunni. Við værum náttúrulega ekki að ræða þetta ef það væri VAR,“'

Samtalið við Elías Inga má heyra í spilaranum. Spjallið hefst þegar um klukkustund og 16 mínútur eru liðnar á þáttinn.