Segir að Trump hefði verið sak­felldur

Einnig kom til greina að ákæra fleiri vegna þessara tilrauna Trumps og var til skoðunar að gera það þegar Trump vann kosningarnar í nóvember.

Þetta kom fram í skýrslu sem Smith skrifaði um rannsókn sína og birt var í nótt. Þar segir Smith að sigur Trumps dragi ekki úr alvarleika glæpa hans, virði sönnunargagna rannsóknarinnar og gildi rannsóknarinnar sjálfrar.

Reglur dómsmálaráðuneytisins segja ekki hægt að sækja sitjandi forseta til saka fyrir glæp og Hæstiréttur Bandaríkjanna hefur þar að auki veitt forsetum umfangsmikla lagalega vernd. Smith hefur sagt upp störfum sínum hjá ráðuneytinu.

Margar mótbárur

Í skýrslu sinni gagnrýnir Smith Trump fyrir „fordæmalausar“ og „glæpsamlegar“ tilraunir hans til að snúa úrslitum kosninganna, meðal annars með ítrekuðum lygum um að svindlað hafi verið á honum og fyrir að ýta undir ofbeldi gegn pólitískum andstæðingum sínum milli kjördags og 6. janúar 2021. Þá ruddust stuðningsmenn hans inn í þinghús Bandaríkjanna í þeim tilgangi að koma í veg fyrir formlega staðfestingu á úrslitum kosninganna 2020.

Smith segir Trump bera ábyrgð á árásinni.

Sjá einnig: Byrjuðu strax að endurskrifa sögu árásarinnar

Þá segir Smith að við rannsóknina hafi verið rætt við fleiri en 250 manns og vitnisburður fenginn frá nærri því sextíu manns.

Smith segir teymi sitt hafa þurft að standa gegn fjölmörgum mótbárum en lögmenn Trumps vörðu gífurlega miklu púðri í að hægja á öllum rannsóknum gegn Trump í þeirri von að hann yrði aftur forseti. Það bar árangur og virðist sem Trump verði frjáls allra mála.

Segist saklaus og aðrir sekir, um eitthvað

Trump tjáði sig um skýrsluna í nótt á Truth social, samfélagsmiðli hans, þar sem hann kallar Smith „sturlaðan“ og segir hann hafa verið rannsakað sig af pólitískum ástæðum fyrir Joe Biden, fráfarandi forseta, sem Trump kallar „spilltan“.

Þá hélt Trump því fram að hann væri saklaus og hélt því fram að skýrsla sem sýndi fram á sakleysi hans og sekt Nancy Pelosi, fyrrverandi þingforseta, og annarra, hefði verið eytt. Um hvað þau eiga að vera sek fylgdi ekki sögunni.

Trump kallaði Smith heimskan saksóknara og sagði að honum hafi ekki tekist að koma málinu fyrir dómara fyrir kosningarnar, sem Trump hefði unnið.

„KJÓSENDURNIR HAFA TALAÐ!!!“

Skrifaði einnig skýrslu um skjalamálið

Smith ákærði Trump einnig vegna leynilegra skjala sem Trump tók með sér úr Hvíta húsinu í janúar 2021, sem hann átti samkvæmt lögum að afhenda Þjóðskjalasafni Bandaríkjanna. Sú ákæra byggði á njósnalögum Bandaríkjanna en málið var fellt niður á mjög umdeildan hátt af dómara í Flórída sem Trump skipaði í embætti á síðustu dögum síðustu forsetatíðar sinnar.

Hún vísaði málinu þó frá og á þeim umdeilda grunni að Smith hefði ekki verið skipaður í embætti samkvæmt lögum, þrátt fyrir fjölmörg fordæmi áratugi aftur í tímann.

Sjá einnig: Vísaði skjalamálinu frá og á lista yfir mögulega dómsmálaráðherra

Sá dómari, sem heitir Aileen Cannon, hefur meinað dómsmálaráðuneytinu að birta skýrslu Smiths í skjalamálinu. Samkvæmt henni má ekki birta skýrsluna opinberlega né afhenda hana þinginu.

Sjá einnig: Ætlar að hætta áður en Trump rekur hann

Sigur Trumps í forsetakosningunum markaði svo í raun endalok á málaferlunum gegn honum, bæði vegna starfsreglna dómsmálaráðuneytisins um að ekki megi sækja sitjandi forseta til saka og sökum þess að hann getur bundið enda á rannsóknirnar sem forseti og skipað dómsmálaráðherra sem gengið getur úr skugga um að málaferlunum sé hætt.

Óljóst er hvort að skýrslan í skjalamálinu svokallaða muni nokkurn tímann líta dagsins ljós. Það er meðal annars vegna þess að málaferli standa enn yfir gegn tveimur starfsmönnum Trumps sem voru einnig ákærðir í málinu.