Dóms­málaráðherra fundar með Sig­ríði og Helga Magnúsi

Þorbjörg Sigríður segir, í samtali við fréttastofu, að hún hafi nú fundað með þeim báðum en sitt í hvoru lagi.

„Já, það hefur aðeins hreifst í þeim málum. Ég hef átt fund ríkissaksóknara og vararíkissaksóknara, sitt í hvoru lagi til að ræða stöðu málsins.“

Verður að finnast lausn á þessum vanda

Þorbjörg Sigríður segir það rétt, hún hafi fengið málið í fangið á Þorláksmessu, á fyrstu degi í ráðuneytinu, á Þorláksmessu hafi hún rætt við Heimi Má fréttamann um málið. Þá hafði Helgi Magnús snúið aftur til starfa hjá embætti ríkissaksóknara en hann hafði verið í veikindaleyfi að undanförnu. Honum var hins vegar ekki úthlutað neinum verkefnum og sagðist Sigríður Friðjónsdóttir ríkissaksóknari í skilaboðum til hans fyrir viku að hans vinnuframlags væri ekki óskað.

Þorbjörg Sigríður sagði þá bagalegt að þessi tvö gætu ekki starfað saman.

„Það lá fyrir ákvörðun forvera míns í þessu máli. Í samhengi hlutanna er ekki langur tími liðinn en þetta mál er til skoðunar í ráðuneytinu,“ segir dómsmálaráðherra nú.

Meginmarkmiðið það að kerfið virki og njóti trausts

Spurð hvort hún meti það svo að hægt sé að ná niðurstöðu sem báðir aðilar geti sætt sig við segist Þorbjörg Sigríður hafi nú hlustað á afstöðu beggja.

„En stóra hagsmunamál almennings er að réttarkerfið virki. Við erum að horfa uppá það að ákæruvaldið, sem er veigamikill hlekkur í þeirri keðju sem réttarkerfið er, virki. Að það njóti trausts og sé starfhæft.“

Dómsmálaráðherra segir meginmarkmiðið það að kerfið funkeri, þeir séu hagsmunirnir sem hún vilji fyrst og síðast verja í þessu máli og fundirnir hafi miðað að því að finna lausnir að teknu tilliti til þeirra.

En snýst þetta mál ekki öðrum þræði um að ríkissaksóknari hafi vald yfir þeirri stofnun sem hún veitir forstöðu?

„Jú, vitaskuld er það stórt atriði í málinu. Ákvörðun forvera míns, Guðrúnar Hafsteinsdóttur, í málinu liggur fyrir um hverjar heimildir ríkissaksóknara voru til að áminna og annað í þeim efnum.“

Nú eru opinberir starfsmenn stundum færðir til í störfum sínum, er það eitthvað sem kemur til greina?

„Ég er búin að hitta þau tvö og heyra þeirra sjónarmið. Markmið mitt er að kerfið fúnkeri og njóti trausts almennings og ég er vitaskuld ekki að fara að leysa úr því hér í viðtali við þig.“