Drög að mál­efna­samningi liggi fyrir

Formlegar meirihlutaviðræður Samfylkingar, Vinstri grænna, Sósíalista, Flokks fólksins og Pírata héldu áfram fimmta daginn í röð í dag. Heiða B. Hilmisdóttir oddviti Samfylkingar segir drög að málefnasamningi liggja fyrir. 

„Við erum búnar að fara í gegnum alla málaflokka og erum komin með drög að sáttmála sem við erum  aðeins að fínpússa. Við leggjum hann svo undir okkar félaga og göngum frá. Ég tel að það sé ekki langt í að við getum kynnt þetta fyrir íbúum,“ segir Heiða.  

Heiða segir að stærstu málin séu húsnæðismál, leikskólamál og fjármál. Ekkert hafi verið litið til málefnasamnings sem gerður var í síðasta meirihluta.

„Við verðum með nýjungar í húsnæðismálum sem ég vona að íbúar taki vel. Þá erum við  með margar aðgerðir á döfinni,“ segir Heiða.

Hún segir að ekki sé búið að ákveða hver verði næsti borgarstjóri en þær hafi ákveðið að ljúka málefnastarfinu áður. 

Ræða framtíð Reykjarvíkurflugvallar

Borgarstjórnarfundur verður haldinn á morgun en oddvitar meirihlutans hafa óskað eftir því að það verði bjöllufundur sem hefur í för með sér að fundinum verður frestað.

Það er því afar ólíklegt að það fari fram umræður um eitthvað af þeim næstum tuttugu tillögum sem Sjálfstæðisflokkurinn hefur lagt fyrir fundinn. Þar á meðal að Reykjavíkurflugvöllur verði festur í sessi til ársins 2040.

Heiða segir að flugvöllurinn hafi verið ræddur í meirihlutaviðræðunum.

Við höfum auðvitað rætt Reykjavíkurflugvöll, hann er inn í aðalskipulagi til ársins 2032. Við munum ræða við samgönguráðherra um framtíð hans,“ segir Heiða.

Hún býst við að þar næsti borgarstjórnarfundur verði í vikunni.

„Við munum óska eftir auka borgarstjórnarfundi í vikunni,“ segir Heiða.