Sam­skiptin furðu­leg og fólk tengt Gylfa við stýrið

Gengið hefur á ýmsu síðustu daga vegna framtíðar Gylfa hjá Val. Skeyti hafa flogið hingað og þangað en mörgum virtist ljóst að hann væri í ferðahug.

Í Valsheimilinu gekk sitthvað á en líka svo miklu víðar. Á fréttagólfum landsins og í hlaðvarpshljóðverum. Hjörvar Hafliðason, sem rekur hlaðvarpið Dr. Football, var einskonar málpípa Gylfa Þórs, þó í gegnum fjölskyldu hans þar sem vitnað var sí og æ í bróður hans og föður varðandi framtíð leikmannsins.

Styrmir segir Gylfa í raun hafa komið beiðnum sínum til félagsins á framfæri með þeim hætti en aldrei formlega beðið félagið sjálft um sölu. Hann furðar sig á samskiptunum.

„Við höfðum ekkert sérstakan áhuga á að Gylfi færi. En við fengum skilaboð í gegnum fjölmiðla og hlaðvörp þó að bein beiðni leikmanns hafi aldrei komið um að fá að fara. En við höfum fylgst með fjölmiðlum eins og aðrir og þá var ekkert annað heldur en að fara í málið og afgreiða það á sem ásættanlegastan máta fyrir félagið. Fyrir mitt leyti og fyrir hönd stjórnarinnar og stuðningsmanna að ég held, þá er niðurstaðan mjög góð fyrir félagið,“ segir Styrmir í samtali við íþróttadeild.

Gylfi hvorki upphaf né endir Vals

Fékkst skýring á því af hverju Gylfi vildi yfirgefa félagið?

„Það hafa verið ýmsar skýringar sem við höfum heyrt, hingað og þangað, en hann segir hagsmunum hans sé betur borgið annars staðar en hjá Val. Við virðum þá skoðun. Við erum stórveldi í íslenskri íþróttasögu og það mun ekkert breytast. Félagið er stofnað 1911 og koma Gylfa til Vals er hvorki upphaf né endir á sögu Vals. Félagið er miklu stærra en einn leikmaður og við erum að vinna að langtíma vegferð fyrir klúbbinn,“ segir Styrmir.

Aðilar tengdir Gylfa sem fara þessa leið

Styrmir segir þá að honum þætti eðlilegra að eiga samskipti beint við Gylfa en ekki við fjölskyldumeðlimi hans í gegnum fjölmiðla og hlaðvörp. Hann segir að Gylfi hafi sagst vilja vera áfram hjá Val þegar hann ræddi við leikmanninn fyrir skemmstu. Skilaboðin utan frá segi aðra sögu.

Ertu ósáttur við framgöngu Gylfa í þessu máli?

„Það er náttúrulega alltaf eðlilegra að menn eigi heiðarleg og opin samskipti. Eins og ég sagði við hann á sínum tíma og spurði: „Viltu fara í Víking?“ Hann sagði við mig þá að það væri best og auðveldast fyrir hann að vera áfram í Val. Svo heldur þetta áfram og fer í gegnum fjölmiðla og það var einhver leið sem þeir aðilar sem standa að honum ákveða að fara. Þá var ekkert annað fyrir okkur að tækla málið út frá okkur,“ segir Styrmir.

Blikar fagmannlegri en Víkingar

Hvortveggja Breiðablik og Víkingur fengu tilboð samþykkt í Gylfa líkt og Vísir greindi frá í gærmorgun. Samkvæmt heimildum Vísis dró Breiðablik sig til baka úr samningsviðræðum við leikmanninn vegna þeirra krafna sem voru gerðar. Gylfi hafi viljað greiðslur sem Blikar hafi ekki verið tilbúnir að skuldbinda sig til.

Óaðspurður segir Styrmir frá fagmennsku Breiðabliks:

„Við fórum bara ákveðna vegferð og áttum frábær samskipti og mjög fagmannleg við Breiðablik og ég virði að minnsta kosti það að þeir komu mjög fagmannlega að þessu máli,“ segir Styrmir.

En er hann þá ósáttur við framgang Víkings?

„Það er ljóst að Víkingar hafa verið að bera víurnar í hann og ekki átt samtal við okkur beint síðan í október, að mig minnir. Það hafa bara komið tölvupóstar með tilboðum. En í lokin voru bara fín samskipti á milli félaganna,“ segir Styrmir. Samkvæmt alþjóðlegum reglum þarf félag að samþykkja tilboð áður en samningsviðræður annars félags við leikmann – formlegar eða óformlegar – geta átt sér stað.

Andar þá köldu milli Vals og Víkings eftir skiptin?

„Eftir þetta? Nei, alls ekki. Ég óska þeim til hamingju með að hafa fengið Gylfa til sín. Ég taldi rétt að hann færi héðan. Það er mat stjórnar. Hann velur að fara í Víking og þá bara óska ég þeim til hamingju með það,“ segir Styrmir.

Ekki ákvörðun Gylfa eins og sér

Styrmir ýjar að því að fólk í kringum Gylfa hafi haft áhrif á ákvörðun hans um að semja við Víking og hér að ofan eru nefndar tilvitnanir í bróður hans og föður í hlaðvarpi. Þá drógu Blikar sig úr samningaviðræðum við Gylfa vegna krafna um greiðslur sem félagið var ekki tilbúið að fallast á.

Um niðurstöðuna segir Styrmir Þór Bragason, varaformaður knattspyrnudeildar Vals: „Það er mat leikmannsins og beggja klúbba hvort þau nái lendingu sem er ásættanleg bæði fyrir klúbbinn og leikmanninn. Það virðist vera að það hafi verið Víkingar og leikmaður sem ákveða að hann endi þar. En ég er ekki endilega að segja að það hafi verið ákvörðun Gylfa hvort að hann endaði hjá Breiðabliki eða ekki,“

„Heldur er það líka Breiðabliks sjálfs að ákveða hvort það semji við leikmanninn. Ég held að menn megi ekki lesa of mikið í endanlega niðurstöðu þar,“ bætir Styrmir við.

Spurður um nánari skýringar á þessu er hann áfram loðinn í svörum:

„Menn verða bara að horfa í gegnum þetta. Það verður væntanlega einhver umfjöllun um þetta í einhverjum hlaðvörpum,“ segir Styrmir.

Leikmenn og stjórn ósátt við Gylfa

Eftir það sem gekk á í síðustu daga og fjölmiðlarokið í kringum framtíð Gylfa í fjölmiðlum og hlaðvörpum ákváðu Valsmenn að gefa eftir um helgina.

Félagið gaf út yfirlýsingu í hádeginu í gær þar sem sagði að Gylfi hefði gerst sekur um ákveðinn trúnaðarbrest gagnvart félaginu og samherjum í liðinu. Talið væri best fyrir alla að hann yfirgæfi félagið.

„Hann hefur sýnt mjög fagmannlega framkomu hér á æfingum og leikjum hingað til. En framkoma hans á móti Skaganum á laugardaginn var bara þess eðlis að bæði leikmenn og þeir sem standa að félaginu og stuðningsmenn mjög ósáttir við það hvernig hans framganga var,“

„Ég held að menn verði bara að setjast niður og horfa á leikinn og séð hvernig það var. Það getur hver sem er séð það, að leikmanni sem á eins feril og Gylfi, að það er ekki mjög fagmannlegt hvernig það fór fram,“ segir Styrmir um framgöngu Gylfa á laugardag.

Fleira kemur fram í viðtalinu sem má sjá í heild í spilaranum.