Bíður í start­holunum í Washington: „Ég elska Ís­land og Sel­foss“

Eins og Vísir fjallaði um fyrir helgi var Wroten meinað um dvalarleyfi hér á landi frá Útlendingastofnun vegna dóms sem hann fékk fyrir að taka þátt í svíkja fé út úr velferðarkerfi NBA fyrir nokkrum árum. Wroten var einn átján fyrrverandi leikmanna deildarinnar sem fékk dóm í svikamálinu. Hann játaði sök, fékk þriggja mánaða skilorðsbundinn dóm og þurfti að greiða sekt.

Þrátt fyrir að dómurinn yfir Wroten hafi fallið 2022 kemur hann enn í veg fyrir að hann fái dvalarleyfi á Íslandi. Lögfræðingur Selfoss skilaði í síðustu viku inn rökstuðningi um að Wroten væri ekki hættulegur samfélaginu og Selfyssingar bíða enn svars við því útspili.

„Mér finnst allt þetta mál skrítið. Ég hef spilað úti um allt í Evrópu og Suður-Ameríku og aldrei átt í vandræðum með að fá dvalarleyfi til að spila körfubolta. Ég meiddi engan og er góður gaur. Ég sé fyrir fjölskyldu minni með því að spila körfubolta og þar líður mér best,“ sagði Wroten í samtali við Vísi. Hann bíður í Washington, tilbúinn að stökkva til Íslands og klára tímabilið með Selfossi ef hann fær tækifæri til.

Þótt leikmenn með ansi veglegar ferilskrár séu æ oftar farnir að reka á íslenskar körfuboltafjörur er Wroten líklega með þá flottustu sem hefur sést hér á landi. Hann lék 145 leiki í NBA en þeir hefðu eflaust orðið talsvert fleiri ef hann hefði ekki slitið krossband í hné í byrjun árs 2015. Hann var þá leikmaður Philadelphia 76ers og hafði skorað 16,9 stig að meðaltali í leik tímabilið 2014-15.

Þrátt fyrir tilkomumikla ferilskrá setur Wroten það ekki fyrir sig að spila í 1. deildinni á Íslandi, hvað þá með liði í botnbaráttu hennar.

Selfyssingar höfðu fyrstir samband

„Mér er í sannleika sagt alveg sama í hvaða deild ég er. Ég elska bara körfubolta og sagði umboðsmanninum mínum bara fyrstur kemur, fyrstur fær. Og Selfoss var fyrsta liðið sem hafði samband. Ég veit hvað ég get og ég elska íslenskan körfubolta, sérstaklega efstu deildina,“ sagði Wroten.

„Þetta var sérstök staða og ég var klár í þessa áskorun. Ég vildi sýna liðum í efstu deild hvers ég er megnugur fyrir þau í framtíðinni.“

Enn einn af þeim bestu

Wroten segir að hann sé enn í fullu fjöri þrátt fyrir að hafa slitið krossband í hné í þrígang á ferlinum.

„Ég var í Suður-Ameríku fyrir þetta og í Grikklandi þar á undan. Ég er að koma til baka eftir meiðsli svo mér var sama hvar ég spilaði. Ég elska bara körfubolta. Ég mun sýna öllum í sterkustu deildunum að ég er enn einn af þeim bestu. Þeir munu sjá það,“ sagði Wroten sem viðurkennir að dómurinn sem hann fékk hafi sett stórt strik í reikning hans.

Var eyðilagður

„Þetta hafði mikil áhrif því ég ætlaði aftur í NBA en eftir að þetta gerðist var sá möguleiki úr sögunni og ég var eyðilagður. En þannig er lífið. Það snýst ekki um hvað gerist heldur hvernig þú tekst á við erfiðleika.“

Wroten kom hingað til lands í byrjun janúar og æfði með Selfossi í mánuð. Hann segist hafa notið sín vel þar.

Hafði áhrif á Selfossi

„Þessi mánuður var frábær. Ég elska Ísland og Selfoss. Og ég trúi því að þennan stutta tíma sem ég var þarna hafi ég breytt öllu liðinu, frá leikmönnum og þjálfara. Sýnt þeim hvað þarf til að vinna. Hvernig á að undirbúa sig og ekki vera sáttur með einn sigur heldur vilja meira. Þess vegna hlakka ég til og vonast til að komast aftur þangað svo við getum gert atlögu að úrslitakeppninni,“ sagði Wroten.

Hann kveðst bjartsýnn á að mál hans leysist og hann geti snúið aftur á Selfoss og klárað tímabilið með liðinu.

Klæjar í fingurna að spila

„Ég held að þetta verði leyst mjög fljótlega og ég fari aftur til Íslands og liðsfélaga minna og þá geti boltinn farið að rúlla. Samherjar, þjálfarar og stjórnarmenn hafa gert allt sem í þeirra valdi stendur til að hjálpa mér að komast aftur,“ sagði Wroten.

„Ég held að Selfoss og allt Ísland sé tilbúið að sjá mig spila. Ég get ekki farið neitt án þess að vera beðinn um mynd og spurður hvenær ég geti spilað svo þeir geti komið á leik,“ bætti leikmaðurinn við.

Selfoss er í ellefta og næstneðsta sæti 1. deildar með tíu stig. Aðeins tvö stig eru þó upp í 9. sætið sem gefur þátttökurétt í úrslitakeppninni. Fjórum umferðum er ólokið í 1. deildinni. Næsti leikur Selfoss er gegn Ármanni á heimavelli á föstudaginn.