Hefur enga skoðun á máli Ragnars Þórs

Greint var frá því í dag að tveir fyrrverandi verkalýðforkólfar sem kjörnir voru á Alþingi í nóvember síðastliðnum fengju greidd laun frá verkalýðsfélögunum út júni og væru þar með á tvöföldum launum fram að sumri.

Um er að ræða Kristján Þórð Snæbjarnarson, þingmann Samfylkingarinnar og fráfarandi formaður Rafiðnaðarsambands Íslands, og Ragnar Þór Ingólfsson, fyrrverandi formann VR.

Sjá: Milljónirnar fari í neyðarsjóð fjölskyldunnar

Sjá: Verður á launum hjá stéttarfélagi og Alþingi út júní

Biðlaun þekkist ekki hjá ASÍ

„Biðlaun þekkjast nú ekki hjá okkur. Yfirleitt þegar gerður er ráðningarsamningur, þá er það gert eftir einhverjum kjarasamningi, og síðan er ákvæði um það hvernig þeim ráðningarsamningi ljúki,“ segir Finnbjörn sem var til viðtals í Reykjavík síðdegis á Bylgjunni í dag.

Þá sé um að ræða það sem kallað er uppsagnarfrestur.

„Við erum með mislangan uppsagnarfrest eftir starfsaldri og annað þess háttar, síðan semja menn um aukinn uppsagnarfrest ef það næst samkomulag um það. Það eru sérstaklega stjórnendur og þeir aðrir sem semja um einhvers konar starfslok þegar þeir hætta.“

Svo semji menn um það hvort þeir þurfi að vinna sinn uppsagnarfrest eða ekki. Stundum fái menn starfslokin greidd upp hvort sem þeir séu að fara í vinnu annars staðar eða ekki.

„Þannig eru svona meginreglurnar hjá okkur á almennum markaði.“

Stéttarfélögin innheimti oft sambærilega samninga

Finnbjörn segist í sjálfu sér ekki hafa skoðun á málum þeirra tveggja. Hann segir að stéttarfélögin séu oft að innheimta slíka starfslokasamninga.

„Þannig við erum stundum að sækja svona mál. Þá er það kannski svoleiðis að atvinnurekandi vill ekki vera borga tvöfalt, en ef þetta er skriflegur samningur og hann er gerður í góðri trú, löglegur, þá ber bara að uppfylla slíkan samning.“

„En síðan verða þeir strákarnir að meta það hvort þeir séu tilbúnir til að taka við þessum launum eða ekki, ég ætla ekki að hafa neina skoðun á því.“

En það hefur komið fram líka í dag að kjaramálasvið VR ráðleggur atvinnurekendum að stöðva greiðslur, þegar starfsmaður hefur farið í nýtt starf, jafnvel þótt hann sé enn á uppsagnarfresti hjá fyrri atvinnurekenda, og þá er spurt hvernig getur stéttarfélag borgað út með þessum hætti þegar þau eru að ráðleggja eitthvað allt annað?

„Já það fer bara eftir samningi sko. Ef það stendur í samningi að vinnuframlags sé ekki óskað hjá viðkomandi launamanni. Þá er hann bara einfaldlega laus, og þá fær hann þetta greitt með jöfnum greiðslum eða einni summu í lok samningstímans, eða ráðningartímans.“

Sólveig Anna Jónsdóttir, formaður Eflingar, sagði í dag að hún ætti einnig rétt á sex mánaða launagreiðslum við starfslok samkvæmt ráðningarsamningi sínum. Hún sagði hins vegar að hún myndi ekki þiggja launin næði hún sæti sem kjörinn fulltrúi.

Sjá: Sólveig með sama rétt en segist ekki myndu nýta hann

Þá hefur það verið rifjað upp þegar Ragnar Þór fordæmdi háa starfslokagreiðslu til ríkislögreglustjóra.

„Það er ótrúlegt að við séum með einhverja pólitíska forréttindastétt sem lýtur einhverjum allt öðrum lögmálum en venjulegt fólk. Við sem erum að starfa innan verkalýðshreyfingarinnar hljótum að gera þá kröfu að við séum með sömu leikreglur fyrir alla," sagði Ragnar Þór á sínum tíma um fráfarandi ríkislögreglustjóra.

Fyrrverandi verkalýðsleiðtogum bjóðist ekki mörg störf

Spurður út í þessi fimm ára gömlu ummæli Ragnars sagði Finnbjörn að menn geti alveg sett hlutina í samhengi við það sem þeir hafi haft skoðanir á gagnvart öðrum.

Hann segir alveg eðlilegt að fólk hafi skoðanir á þessu.

„Jájá. Það sem mér finnst að þurfi að vera, ef að þeir félagar hafa gert samkomulag í upphafi síns starfsferils, þar eru þeir bara að verja sig, vegna þess að ég geri ráð fyrir því að það standi ekkert rosalega mörg störf til boða hjá atvinnurekendum fyrir fyrrverandi verkalýðsleiðtoga, og sérstaklega ekki í þeim geira sem að viðkomandi hefur verið að semja um laun hjá.“ sagði Finnbjörn.

Hann segir allan gang vera á því hvernig gangi fyrir forystusauði verkalýðshreyfingarinnar á leita á ný mið. Það sé ekkert á vísan að róa í þeim efnum.

En það getur líka verið verðmætt að fá þessa aðila til vinnu?

„Jájá það eru heilmikil verðmæti í þekkingu þeirra,“ sagði Finnbjörn.