Tiger syrgir móður sína og sleppir Players

Woods, sem unnið hefur 15 risamót á ferlinum, missti einnig af Genesis Invitational í síðasta mánuði í kjölfar þess að móðir hans féll frá.

Hann tók þó þátt í TGL-innanhússmóti síðasta mánudag en gaf til kynna í viðtali í vikunni að hann yrði ekki með á Players. Nú hefur PGA staðfest að hann verði ekki með.

„Þetta var í þriðja sinn sem ég snerti kylfurnar síðan að mamma lést svo ég er ekki alveg kominn inn í þetta aftur,“ sagði Tiger við Sports Illustrated.

„Ég er ekki alveg með hjartað í því að æfa núna. Ég hef haft svo margt annað að gera. Þegar mér fer vonandi að líða aðeins betur þá fer ég af stað aftur og skoða dagskrána,“ sagði Tiger.

Þetta verður sjötta árið í röð sem að Tiger missir af Players, sem kallað hefur verið „fimmta risamótið“ og er eitt það virtasta í golfíþróttinni.

Hins vegar verða 48 af 50 efstu mönnum heimslistans með á mótinu og stefnir sá efsti, Scottie Scheffler, á að verða fyrsti kylfingurinn til að vinna mótið þrisvar síðan að Jack Nicklaus afrekaði það árið 1978.