Seðlabankastjórinn Carney verður for­sætis­ráð­herra Kanada

„Bandaríkin eru ekki Kanada. Og Kanada mun aldrei verða hluti af Bandaríkjunum á neinn hátt,“ sagði Carney þegar hann ávarpaði stuðningsmenn sína í gær. Var hann að vísa til hugmynda Donald Trump Bandaríkjaforseta um að Kanada verði 51. ríki Bandaríkjanna.

Carney tekur við af Justin Trudeau við fordæmalausar aðstæður, þar sem stjórnvöld í Bandaríkjunum hafa lagt 25 prósent toll á vörur frá nágrannaríkinu. Carney sagði í gær að Kanadamenn hefðu ekki beðið um tollastríð en myndu hafa sigur.

Trudeau sagðist stoltur af arfleifð sinni en varaði við hættulegum tímum þar sem ekkert væri fast í hendi; hvorki lýðræðið, frelsið né Kanada sem slíkt.

Carney og Trudeau eru sagðir munu funda á næstu dögum til að ákveða hvenær síðarnefndi hættir og fyrrnefndi tekur við. Carney verður annar forsætisráðherran í sögu landsins án þingsætis en mun leiða Frjálslynda flokkinn í næstu þingkosningum.

Carney var bankastjóri Seðlabanka Kanada frá 2008 til 2013 og bankastjóri Bank of England frá 2013 til 2020.