Bíða enn niður­stöðu um varð­hald

Þremenningarnir voru þeir fyrstu sem handteknir voru í tengslum við málið og hafa nú þegar setið í gæsluvarðhaldi í viku. Ekki hefur verið tekin ákvörðun um hvort farið verði fram á lengra varðhald yfir fleirum að svo stöddu, en þó er einnig beðið eftir niðurstöðu Héraðsdóms vegna kröfu um gæsluvarðhald yfir konu sem var handtekin í gærkvöldi. 

Hún er sjöundi meinti sakborningurinn í málinu, sem rannsakað er sem hugsanlegt manndráp, frelsissvipting og fjárkúgun. Rannsóknin er sögð miða ágætlega, að sögn Jóns Gunnars Þórhallssonar, yfirlögregluþjóns á Suðurlandi. Hann segir mikla vinnu í gangi á mörgum stöðum, en lögreglustjórinn á Suðurlandi hefur notið aðstoðar frá embættum ríkislögreglustjóra, lögreglustjórans á höfuðborgarsvæðinu og héraðssaksóknara. 

Jón Gunnar segir jafnframt að magn gagna sé mikið, um sé að ræða meðal annars vitnaskýrslur, myndbönd og annað sem til rannsóknar sé. Réttarkrufning fari fram samhliða rannsókn málsins og er beðið niðurstöðu hennar. Bráðabirgðaniðurstöður eru veittar lögreglu áður en endanleg niðurstaða liggur fyrir.