„Myndi ekki einu sinni segja að þetta hafi verið draumur"

Aron Guðmundsson skrifar frá Pristina í Kósovó.

Upp­selt er á leik Ís­lands og Kó­sovó ytra í kvöld á leik­vangi sem tekur um fjórtán þúsund manns.

Leikurinn markar upp­hafið á nýjum kafla ís­lenska lands­liðsins undir stjórn Arnars Gunn­laugs­sonar sem hefur veðjað á nýjan fyrir­liða fyrir ís­lenska lands­liðið, Orra Stein Óskars­son, fram­herja Real Sociedad.

„Þetta er frábært augna­blik fyrir mig," segir Orri Steinn lands­liðs­fyrir­liði. Ég er mjög stoltur af því að vera orðinn fyrir­liði Ís­lands. Ég myndi ekki einu sinni segja að þetta hafi verið draumur því ég hafði aldrei hugsað út í það að þetta myndi gerast. Auðvitað er það samt draumur, ég er mjög stoltur og ég hlakka til að leiða strákana inn á völlinn."

Breytist eitt­hvað þegar að maður er orðinn fyrir­liði? Breytir þetta ein­hverju í þínu fari í lands­liðs­verk­efnum eða snýst þetta um að þú sért enn sami, gamli, góði Orri?

„Ég held það sé mikilvægt að breytast ekki of mikið því það voru ákveðnir hlutir sem að skiluðu mér hingað sem að skil­greina mig sem mann­eskju. En auðvitað heldur það manni aðeins á tánum og það er aðeins meiri ábyrgð og aðeins meiri pressa sem fylgir sem mér fannst margir af okkar ungu leik­mönnum til­búnir í."

Viðtali við Orra í heild sinni má sjá hér fyrir neðan. Bein út­sending og opin dag­skrá hefst frá leik Kósovó og Íslands á Stöð 2 Sport klukkan korter í átta í kvöld.