Piastri vann Kínakappaksturinn

Piastri var á ráspól og var nánast allan tímann með forystuna. Hann kom fyrstur í mark, á undan samherja sínum, Lando Norris sem vann ástralska kappaksturinn um síðustu helgi.

George Russell á Mercedes varð þriðji og Charles Leclerc á Ferrari fjórði. Samherji hans, Lewis Hamilton, sem vann sprettkeppnina í gær, hleypti honum fram úr sér.

Piastri hefur nú unnið þrjár keppnir í Formúlu 1 á ferlinum. Hann er í 4. sæti í keppni ökuþóra með 34 stig. 

Norris er efstur með 44 stig, átta stigum á undan heimsmeistaranum Max Verstappen á Red Bull. Russell er svo þriðji með 35 stig.