„Með­vituð um að þetta er sam­fé­lags­legt vanda­mál“

Elmar Atli Garðarsson, fyrirliði Vestra, var á dögunum dæmdur í bann vegna veðmála á leiki í Bestu deildinni og mun hann missa af hluta komandi Íslandsmóts sem hefst á laugardag. Hann er þriðji leikmaðurinn sem dæmdur er í bann fyrir slíkt á þremur árum.

Erlendur eftirlitsaðili sér um að fylgjast með mögulegum brotum, sem fer í gegnum Evrópska knattspyrnusambandið, UEFA.

„Við erum með vöktunaraðila á öllum leikjum KSÍ og fáum ábendingu þegar eitthvað óeðlilegt er í gangi. Þá eru virkjaðir ferlar hér innandyra og það fer sína leið í kerfinu eins og fyrri dæmi hafa sýnt,“ segir Eysteinn Pétur Lárusson, framkvæmdastjóri KSÍ, í samtali við íþróttadeild um eftirlitið.

„Þetta er í gegnum UEFA, í raun og veru, og í gegnum okkar samninga við aðila úti sem vakta þessa leiki,“ segir Eysteinn og bætir við:

„Við fáum alltaf inn á borð, eitthvað reglubundið. Því miður eru þannig mál sem þarf að vísa áfram. Hvert mál er einu máli og mikið í því samhengi.“

Davíð hafi rétt á sinni skoðun

Veðmálaauglýsingar hafa færst í aukana í kringum hlaðvarpsþætti um fótbolta sem og á samfélagsmiðlum. Eysteinn segir veðmálastarfsemina viðfangsefni sem þurfi að nálgast frá nokkrum hliðum og endurskoða heilstætt.

„Í umræðunni heyrir maður að það sé aukning og menn vilja meina. Við erum meðvituð um að þetta er samfélagslegt vandamál. Við þurfum einhvern veginn að bregðast við því,“ segir Eysteinn.

Davíð Smári Lamude, þjálfari Vestra, sagði við Vísi, eftir að Elmar var dæmdur í bannið, að líklega önduðu margir leikmenn í Bestu deildinni léttar. Það væri vegna þess að þeir hefðu ekki náðst, þar sem töluvert meira væri um veðmál leikmanna í deildinni en þegar hefði komið í ljós.

Um ummæli Davíðs segir Eysteinn:

„Hann hefur rétt á sinni skoðun, þetta er skoðunin hans. Það getur vel verið að það sé meira um þetta en við áttum okkur á. Þess vegna þurfum við að efla fræðsluna. Það breytir því ekki að við náum kannski ekki öllum, lögreglan nær ekki öllum sem keyra of hratt á þjóðvegum landsins, en vonandi náum við að fyrirbyggja sem mest.“

Staðan áhyggjuefni

Hlutaðeigandi aðilar, til að mynda leikmannasamtökin og hagsmunasamtökin ÍTF muni þá koma að átaki KSÍ hvað þessi mál varðar. Staðan sé áhyggjuefni.

„Þetta er áhyggjuefni, myndi ég segja. Við þurfum einhvern veginn að reyna að fara meira í fræðslu og forvarnir. Við erum að fara í samtarfsverkefni með SÁÁ, varðandi veðmálafíkn, og ég veit að ÍTF er líka að taka á fræðslu og forvörnum í Bestu deildunum, sem og Leikmannasamtökin líka. Þannig að við erum að sameinast um það að reyna að sporna við þessu eins og hægt,“ segir Eysteinn.

KSÍ auglýsir Lengjuna

Auglýsingar veðmála eru ekki löglegar í íslenskum fjölmiðlum, að undanskildum þeim frá Lengjunni. Í hlaðvörpum og á samfélagsmiðlum má aftur á móti sjá töluvert um auglýsingar erlendra veðmálasíðna á við EpicBet og Coolbet.

Vegna þess hve samofnar veðmálaauglýsingar eru orðnar íþróttaumfjöllun segir Eysteinn þurfi að móta heildræna stefnu hvað þessi mál varðar. 

„Ég held að íþróttahreyfingin og stjórnvöld þurfi náttúrulega bara að taka á þessu og móta stefnu. Það er eitthvað sem þarf að gerast. Það breytir því ekki að við erum með ákveðnar reglur í fótboltanum og þurfum að fara eftir þeim. Eitt af því er að allir skrifa undir leikmannasamninga, þar er skýrt að það er bannað að veðja á leiki KSÍ, þannig að það á ekki að koma neinum á óvart að sem skrifar undir leikmannasamning KSÍ,“ segir Eysteinn.

Nú er KSÍ með bæði Lengjudeildina og Lengjubikarinn á sínum vegum. Orkar tvímælis að KSÍ tali gegn veðmálum en auglýsi starfsemina með þeim hætti?

„Ég veit ekki hvað segja skal um það. Auðvitað þarf að taka heildstæða umræðu, í hvaða átt við viljum fara og hvernig við viljum hafa regluverkið í kringum þetta,“ segir Eysteinn.

Viðtalið má sjá í heild í spilaranum að neðan.