Tæp­lega ein og hálf milljón eggja ofan í lands­menn

Hörð og ljúffeng súkkulaðiskelin sem geymir ýmislegt góðgæti og hinn ævinlega mikilvæga málshátt er órjúfanlegur partur af páskunum en hvaðan koma eggin sem við dýrkum og dáum, hvað borðum við mikið af þeim og hvaða egg eru vinsælust? Ísland í dag fór á stúfana og kannaði málið.

Það má segja að það sé örlítið á reiki hvenær sala á páskaeggjum, eins og við þekkjum þau í dag, hófst en talið er að Björnsbakarí hafi riðið á vaðið í kringum árið 1920 með páskaegg úr marsipan og súkkulaði. Eggin slógu í gegn og kemur það bersýnilega í ljós í auglýsingum á árunum 1920 til 30 að færri hafi komist að en vildu. Í dag eru þrír risar á páskaeggjamarkaði, Nói Siríus, Góa og Freyja.

Hjá Nóa Siríus eru framleidd á bilinu 700 til 800 þúsund páskaegg fyrir þessa páska, hjá Freyju er talan í kringum 400 þúsund og hjá Góu 200 þúsund stykki. Þannig að tæplega ein og hálf milljón páskaeggja eru framleidd ofan í landann bara hjá þessum þremur, stærstu páskaeggjarisum. Þetta kemur í ljós í Íslandi í dag en enn fremur hve undarlegar beiðnir hafa komið í gegnum tíðina frá fólki sem vildi bæta einhverju inn í eggin - allt frá trúlofunarhringum til hjálpartæki ástarlífsins! En náði hjálpartækið alla leið inn í eggið?

„No comment,“ segir Anna Fríða hjá Nóa Siríus.

Atli hjá Góu lumar líka á sögu um mann sem vildi gleðja öll tíu barnabörnin með peningagjöf sem var handsett inn í jafnmörg páskaegg.

Þetta og ýmislegt fleira um páskaegg í þættinum hér fyrir neðan.