„Að fá sér Bryndísarpizzu skiptir máli“

„Það er ómetanlegt að Domino’s láti allt söluandvirðið renna til sjóðsins en ekki einungis ágóðann,“ segir Birgir Karl Óskarsson, faðir Bryndísar Klöru, í fréttatilkynningu um málið.

„Að fá sér Bryndísarpizzu, hefur stóran boðskap því þannig minnumst við Bryndísar Klöru og sameinumst í að gera samfélagið betra í hennar nafni.“ 

Birgir Karl

Pizzan er samsett af meistarakokknum Hrefnu Rós Sætran og er sannkölluð sælkerapizza sem inniheldur meðal annars pepperoni, mortadella skinku, burrata ost og pistasíur.

Minningarsjóður Bryndísar Klöru var stofnaður til að heiðra líf Bryndísar Klöru, með það að markmiði að vernda börn gegn ofbeldi og efla samfélag þar sem samkennd og samvinna eru í forgrunni.

„Bryndís Klara var stelpa með stórt hjarta. Hún var hugulsöm og hugrökk og hafði sérstakt lag á að sjá þá sem öðrum yfirsást. Eftir þennan hörmulega atburð á Menningarnótt, ákváðum við að nafn hennar skyldi og yrði að standa fyrir breytingar, fyrir öruggari æsku barna og unglinga, og samfélagið í heild sinni,“ segir Iðunn Eiríksdóttir, móðir Bryndísar Klöru.

Auk góðgerðarpizzunnar verða seldar fallegar, bleikar svuntur með nafni og merki Minningarsjóðsins en bleikur var uppáhaldslitur Bryndísar Klöru. Svunturnar verða seldar í Kringlunni dagana 7. - 13. apríl eða á meðan birgðir endast.

Bryndís Klara starfsmaður Domino’s

Bryndís Klara var starfsmaður Domino’s og Domino’s vill heiðra minningu hennar með framlagi í sjóðinn.

„Við hjá Domino’s erum hluti af samfélaginu og Bryndís Klara var mikils metin hluti af teyminu okkar. Þess vegna viljum við öll, starfsfólk Domino’s á Íslandi, að Góðgerðarpizzan 2025 verði tileinkuð minningu hennar og sala pizzunnar fari óskipt til minningarsjóðsins,“ segir Ásmundur Atlason, markaðsstjóri

„Þess vegna viljum við öll, starfsfólk Domino’s á Íslandi, að Góðgerðarpizzan 2025 verði tileinkuð minningu hennar og sala pizzunnar fari óskipt til minningarsjóðsins,“ segir Ásmundur.

Samstarfið skipti máli

Síðan 2013 hefur Domino’s selt Góðgerðarpizzuna á hverju ári þar sem öll sala hefur farið óskipt til góðgerðarmála.

„Markmið minningarsjóðsins er að styðja við verkefni sem vernda börn gegn ofbeldi og efla samfélag þar sem samkennd og samstaða er í forgrunni. Við viljum búa í samfélagi þar sem kærleikurinn ræður ríkjum,“ segir Guðrún Inga Sívertsen, formaður minningarsjóðsins.

„Þess vegna skiptir samstarfið við Domino’s okkur miklu máli, í raun er þetta ómetanlegt framtak hjá þeim – því með hverri pizzu sem seld er í hennar nafni, minnumst við hennar og stöndum saman um að bæta samfélagið okkar,“ segir Guðrún Inga.