Stórleikur Andra Más dugði ekki gegn Magdeburg

Leipzig sem Rúnar Sigtryggsson þjálfar tók á móti Magdeburg í þýsku úrvalsdeildinni í handbolta í dag. Magdeburg sat í 6. sæti deildarinnar fyrir leikinn en gæti, með sigri í þeim leikjum sem liðið á til góða, komið sér aðeins einu stigi frá toppliðum deildarinnar.

Leikurinn í dag var jafn og spennandi. Heimamenn í Leipzig voru einu marki yfir í hálfleik og í síðari hálfleik var jafnt á öllum tölum þar til Magdeburg náði tveggja marka forystu í stöðunni 25-23.

Eftir það var Magdeburg með frumkvæðið og komst mest þremur mörkum yfir. Þegar fimmtán sekúndur eftir gat Magdeburg tryggt sér sigurinn með marki úr vítakasti. Matthias Musche klikkaði hins vegar og Lepizig fékk tækifæri til að jafna. Andri Már fékk skot á lokasekúndunum en tókst ekki að skora og Magdeburg fagnaði 31-30 sigri. 

Andri Már átti góðan leik fyri Leipzig og skoraði sjö mörk. Gísli Þorgeir Kristjánsson skoraði fjögur mörk fyrir Magdeburg og Ómar Ingi Magnússon eitt. Leipzig er í 13. sæti í ágætri fjarlægð frá fallsæti en Magdeburg í 6. sæti að reyna að eltast við toppliðin.

Misstu af gullnu tækifæri

Hannover Burgdorf var í 3. sæti fyrir leiki dagsins og gat með sigri gegn Göppingen á heimavelli tyllt sér á topp deildarinnar, uppfyrir bæði Fusche Berlin og Melsungen.

Leikurinn reyndist hins vegar erfiðari fyrir heimaliðið en flestir bjuggust við en Göppingen var í 14. sæti fyrir leik. Eftir jafnan fyrri hálfleik náði Göppingen áhlaupi undir lok hans og leiddi 18-15 í hálfleik.

Þegar Göppingen náði síðan fimm marka forystu um miðjan fyrri hálfleik áttu heimamenn engin svör. Þeir komust mest átta mörkum yfir og unnu að lokum 36-30 sigur.

Ýmir Örn Gíslason skoraði eitt mark fyrir Göppingen en lærisveinar Heiðmars Felixsonar í Hannover Burgdorf naga sig eflaust í handarbökin að hafa misst af tækifærinu að ná toppsæti deildarinnar.