Hressi­lega kaótískir morgnar sem eiga það til að klikka smá

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég á það til að vakna helst eins seint og ég kemst upp með. Það er ekkert vit í því að vakna snemma á morgnana, það skemmir alveg fyrir manni kvöldin - besta tíma sólarhringsins! Það er nefnilega á kvöldin sem ég fæ besta tímann í næði til að hugsa, melta hugmyndir, fræðast og skoða.“

Hvað er það fyrsta sem þú gerir á morgnana?

„Morgnarnir á mínu heimili eru líflegir og kaotískir - þá geri ég tilraun til þess að múltítaska eins og vindurinn og samtímis er ég að græja yngri dótturina í leikskólann, drekka kaffibolla á hlaupum, finna mér föt, rúlla yfir tölvupóstinn, skella á mig maskara, gefa hundinum og kettinum að borða og vera eldri dótturinni innan handar. 

Þetta hefur alveg átt það til að klikka smá; ósamstæðir sokkar og maskari bara á öðru auganu, en það er mikilvægt að hafa bara húmor fyrir því og halda brosandi út í daginn. 

Ég nota svo tímann þegar ég keyri í vinnuna að setja mig í gírinn, renni í huganum yfir verkefni dagsins og skipulegg og forgangsraða því sem fyrir liggur.

Hvert er öfgafyllsta æðið fyrir einhverju sem þú hefur fengið?

„Ætli það væri ekki eitthvað tengt mataræði, ég dett í það að borða bara eitthvað eitt sem mér finnst gott svo dögum skiptir. Nýjustu dæmin eru bananar, þar á eftir voru það kókoskúlur og svo er ég mikið að vinna með ostaslaufur núna. Öfgafyllsta æðið hlýtur þó að vera kaffi, það hefur fylgt mér lengi og ég held að það hljóti að teljast öfgafullt hvað ég drekk mikið af því á hverjum degi.

Í hvaða verkefni ertu að vinna þessa dagana?

„Um þessar mundir erum við á fullu við undirbúning stórra herferða fyrir sumarið, þetta er minn uppáhalds tími ársins í vinnunni. Ég vinn með ólíkum fyrirtækjum, bæði hér heima og erlendis, sum eru að undirbúa stærsta tíma ársins en önnur að detta í ákveðinn viðhaldsfasa á þessum tíma. 

Á þeim níu árum sem ég hef starfað hjá SAHARA hefur landslagið breyst gífurlega og þá helst hvað varðar stafræna markaðssetningu. Í byrjun snérist árangurinn kannski mest um hversu mörg „like” fengust, og Facbook Live var það heitasta í bænum. Í dag er stöðugt símat á öllum aðgerðum, þar sem lykilmælikvarðar eru mun fleiri og flóknari. Media mixið hefur gjörbreyst og miðlarnir í stöðugri þróun, og það verður sífellt mikilvægara að meta allar aðgerðir í samhengi, bæði online og offline, kostaðar eða ekki. Hinir fjölmörgu snertifletir hafa ólík markmið og ekki öllum ætlað að leiða til beinnar sölu, en mikilvægt þó að meta heildaráhrif hverrar aðgerðar. Það virðist stundum ríkja sá misskilningur að herferðir á samfélagsmiðlum séu skammtíma árangur, en staðreyndin er sú að þær eru hluti af langtíma stefnu og ættu að vera metnar í því samhengi.

Samhliða því að vera stöðugt að þróa okkar aðferðir og þjónustu finnum við fyrir viðhorfsbreytingu fyrirtækja þegar kemur að stefnu þeirra í markaðsmálum. Þau vilja kvika og lipra þjónustu sem talar saumlaust við það hraða og síbreytilega umhverfi sem við búum við í dag. Þetta þýðir að við þurfum að hafa mjög góðan skilning á samþættingu alls ferlisins sem er í takt við þá vinnu sem við höfum unnið að síðustu árin.“

Hvernig skipuleggur þú þig í vinnu?

„Að eðlisfari er ég ekki skipulögð, allavega ekki á mælikvarða flestra annarra. Skipulag er eitthvað sem ég þarf meðvitað að tileinka mér á hverjum degi. Asana er eiginlega púlsinn í fyrirtækinu og það hjálpar mjög við að hafa góða yfirsýn yfir allt sem er í gangi. En með árunum hef ég lært að það er allt í lagi að passa ekki alltaf alveg í sama form og aðrir. 

Ég er með gott sjónminni, það nægir mér að lesa eitthvað eða heyra og þá er það komið í heilann, og það gerir mér kleift að hlaupa hratt með verkefnin. 

Ég er stundum kölluð jarðýta í vinnunni, í því samhengi að ég læt hlutina gerast. Ætli það sé ekki ágætis lýsing á mér.“

Hvenær ferð þú að sofa á kvöldin?

„Á kvöldin gerast töfrarnir, hausinn á fullu og allar bestu hugmyndirnar brjótast fram. Reyni að fara að sofa fljótlega upp úr miðnætti en það tekst nú ekki alltaf.“