Tvö ó­lík fram­boð bárust áður en fresturinn rann út

Willum Þór Þórsson, Olga Bjarnadóttir og Brynjar Karl Sigurðsson höfðu þegar tilkynnt framboð en Valdimar Leó Friðriksson og Magnús Ragnarsson bættust við listann á föstudag og frambjóðendur til forseta ÍSÍ verða því alls fimm.

Valdimar og Magnús eru tveir ólíkir frambjóðendur.

Hrærst innan hreyfingarinnar í áratugi

Valdimar situr í framkvæmdastjórn ÍSÍ og hefur síðustu áratugi sinnt ýmsum stjórnunarstörfum innan íþróttahreyfingarinnar.

„Ég hef starfað frá foreldraráði og alla leið upp, tekið að mér ýmis konar rekstur bæði félaga, héraðssambanda og sérsambanda. Það þýðir að það er þekking á öllum þessum rekstri. Ég veit hvar skóginn kreppir, hvað það er sem fólkinu vantar til að geta rekið sig sómasamlega“ segir Valdimar.

Ekki innvígður í efri lög ÍSÍ

Magnús kveðst hins vegar fjarri því að vera innvígður í efri lög ÍSÍ og segist bjóða sig fram sem fulltrúi grasrótarinnar.

„Ég tilheyri ekki þessu stjórnskipulagi ÍSÍ í dag. Ég er formaður Tennissambandsins og hef tekið þátt í almenningsíþróttum í mörg herrans ár, en ég er ekki hluti af þessum öflum sem ráða þarna í dag. Ég er fulltrúi þessara litlu afla í hreyfingunni“ segir Magnús.

Hann sækir sína reynslu frekar úr viðskipta- og atvinnulífinu.

„Ég þekki þessa viðskiptahlið, að búa til peninga innan hreyfingarinnar og ég held að ÍSÍ vanti þann þátt.“

Mismunandi áherslur

Magnús talar fyrir einföldun á skipulagi og í forgangi verður að efla tekjustofna ÍSÍ.

„Það þarf náttúrulega að fjármagna hreyfinguna betur og íþróttahreyfingin er komin á þann stað að hún þarf ekkert að standa með einhvern betlistaf. Þetta er orðið einn af máttarstólpum samfélagsins og ég held að allir viðurkenni það“ segir Magnús.

Valdimar leggur hins vegar áherslu á meiri fjárstuðning frá ríki og sveitarfélögum.

„Einhvern tímann var ég kallaður Valdimar styrkur af því að ég hef svo mikinn áhuga á auknu fé frá ríki og sveitarfélögum. Ég átti á sínum tíma hugmyndina að rekstrarstyrk til sérsambanda og ætla að gera tilraunir í ágúst til að tvöfalda hann… Síðan átti ég þátt í að koma á laggirnar ferðasjóði sem er fyrst og fremst hugsaður fyrir landsbyggðina. Þar er kominn tími líka á að tvöfalda. Það verða svona helstu áherslumálin, auk þess að sjálfsögðu að hlúa að sjálfboðaliðunum“ segir Valdimar.

Fjallað var um frambjóðendurna tvo í Sportpakkanum á Stöð 2 í gærkvöldi. Innslagið má sjá í spilaranum að ofan. 

Hér fyrir neðan má svo finna viðtölin við þá í heild sinni þar sem farið er nánar yfir þeirra reynslu og helstu stefnumál.