Segir sveppa­eitrunina hafa verið „hörmu­legt ó­happ“

Fyrrverandi tengdaforeldar Erin Patterson og systir fyrrverandi tengdamóðurinnar létust eftir matarboð þar sem hún bar fram máltíð sem í var grænserkur, einn eitraðsti sveppur í heimi, árið 2023. Eiginmaður tengdamóðursysturinnar veiktist alverlega en komst lífs af.

Patterson er ákærð fyrir að valda dauða fólkins og að reyna að drepa manninn sem lifði af. Réttarhöld hófust yfir henni í bænum Morwell í Viktoríuríki í morgun.

Lögmenn hennar sögðu við upphaf réttarhaldanna að málsvörnin byggðist á því að um harmleik hefði verið að ræða, hörmulegt óhapp, að því er kemur fram í frétt breska ríkisútvarpsins BBC.

Engu að síður viðurkennir Patterson að hún hafi tínt villta sveppi, logið að lögreglunni og losað sig við sönnunargögn. Hún hafi einfaldlega verið gripin ofsahræðslu eftir að hún eitraði óvart fyrir fjölskyldunni.

Gaf misvísandi skýringar á uppruna sveppanna

Ekki er deilt um að grænserkur hafi verið í máltíðinni, Wellington-steik með kartöflumús og grænum baunum. Úrlausnarefni dómstólsins væri hvort að Patterson hefði ætlað sér að drepa fólkið.

Saksóknari sagði að rannsakendur hefðu upphaflega talið að um fjöldamatareitrun hefði verið að ræða. Nú teldi ákæruvaldið að Patterson hefði eitrað vísvitandi fyrir gestum sínum til þess að myrða þá. Ekki væri þó hægt að segja hvað henni hefði gengið til með drápunum.

Sönnunargögn yrðu lögð fram um að Petterson hefði tínt sveppi á slóðum þar sem vitað væri að grænserkir yxu. Í matarboðinu hafi hún svo borðað af öðruvísi diski en gestirnir. Dagana eftir matarboðið hefði hún reynt að hylja spor sín, meðal annars með því að losa sig við matvinnslutæki sem hún notaði. 

Þá hefði hún gefið lögreglu misvísandi skýringar á hvaðan sveppirnir komu. Fyrst hefði hún sagt að þeir kæmu úr asískri matvöruverslun í Melbourne og að hún hefði aldrei tínt villta sveppi sjálf.

Vildi ekki leggjast inn eða láta lækna skoða börnin sín

Patterson bauð tengdafólki sínu og fyrrverandi eiginmanni í mat í þeim tilgangi að ræða krabbameinsgreiningu hennar. Hún hafði hins vegar ekki verið greind með krabbamein. Fyrrverandi eiginmaðurinn afboðaði sig á síðustu stundu. Hann segist hafa fundist sambandið við Patterson vera orðið „óþægilegt“ eftir að þau skildu í vinsemd fyrr sama ár og matarboðið örlagaríka var haldið. 

Gestirnir létust á sjúkrahúsi eftir heiftarleg veikindi. Patterson fór sjálf á sjúkrahús en neitaði ítrekað að láta leggja sig in. Læknir sem annaðist gesti hennar hafði svo miklar áhyggjur af velferð hennar að hann hafði samband við lögreglu til að aðstoða sig. Þá neitaði Patterson að leyfa læknum að skoða börnin sín sem hún sagði að hefðu borðað afgang af matnum, þó án sveppanna sem hún sagðist hafa skafið af þar sem börnin vildu þá ekki.

Patterson var upphaflega ákærð fyrir tilraun til manndráps á fyrrverandi eiginmanni sínum en sá hluti ákærunnar var felldur niður.