Börn í Laugar­dal fögnuðu fjöl­breyti­leikanum í ár­legri gleði­göngu

Börn úr leikskólunum Hofi og Laugasól og börn úr Laugarnes- og Laugalækjarskóla tóku þátt í göngunni ásamt starfsfólki og fjölda foreldra.

Gleðigangan er hápunktur gleðiviku sem skólarnir hafa allir haldið upp á alla vikuna og er hluti af regnbogavottun skólanna. Í gleðiviku fagna þau fjölbreytileikanum, gleðinni og að þau eru eins og þau eru eins og sungið er um í lagi Hinsegin daga árið 2019. 

Gengið var frá hverju skólahúsnæði og á Þróttaravöllinn. Hulda Margrét, nemandi í Laugalækjarskóla, söng lagið Skínum skært sem var lokalag Krakkaskaupsins og Páll Óskar flutti þrjú lög. Allt fyrir ástina, Ég er eins og ég er og Gordjöss.