Þjálfar enn í skugga réttar­haldanna

VG greinir frá því að Ingebrigtsen sé að þjálfa Portúgalann José Carlos Pinto og hann hafi verið við æfingar í Sandnes í Noregi.

Pinto hefur birt myndir frá æfingunum á samfélagsmiðlum og umboðsmaður hans staðfesti við VG að hann væri að æfa undir handleiðslu Ingbrigtsens.

Pinto hefur sex sinnum orðið landsmeistari í Portúgal og er í 92. sæti á heimslistanum í fimmtán hundruð metra hlaupi. Besti tími hans í greininni er 3:37,73 mínútur.

Að sögn umboðsmanns Pintos ætlar hann að keppa á þremur mótum í Noregi í næsta mánuði.

Réttarhöldunum yfir Ingebrigtsen lauk fyrir nokkrum dögum. Úrskurður í málinu verður kveðinn upp 16. júní. Ingebrigtsen er sakaður um að hafa beitt son sinn, hlauparann Jacob, og dóttur sína, Ingrid, andlegu og líkamlegu ofbeldi. Saksóknarar í málinu fóru fram á tveggja og hálfs árs fangelsi yfir Ingebrigtsen.