Þýska­land, Úrúgvæ og Serbía með Ís­landi í riðli á HM

Heimsmeistaramótið fer fram í Þýskalandi og Hollandi dagana 26. nóvember til 14. desember. Dregið var í riðla rétt áðan og útsendinguna má sjá hér fyrir neðan.

Alls leika 32 lið á mótinu. Þeim var skipt í fjóra styrkleikaflokka fyrir dráttinn og Ísland var í þriðja flokki. Dregið var í átta fjögurra liða riðla og þar lenti Ísland í C-riðli, með Þýskalandi úr efsta styrkleikaflokki, Úrúgvæ úr öðrum styrkleikaflokki og Serbíu úr fjórða styrkleikaflokki. 

Þrjú efstu liðin úr hverjum riðli komast áfram í milliriðla og spila þá að minnsta kosti þrjá leiki til viðbótar. Neðsta lið hvers riðils fer hins vegar í Forsetabikarinn svokallaða.

Íslenska landsliðið vann Forsetabikarinn og hafnaði í 25. sæti á síðasta HM, í desember 2023, þegar liðið tók þátt í mótinu í annað sinn. Fyrsta HM Íslands var árið 2011 þegar liðið hafnaði í 12. sæti.

Röðun í riðlana átta má sjá hér fyrir neðan. 

A-riðill: Danmörk, Rúmenía, Japan, Króatía

B-riðill: Ungverjaland, Sviss, Senegal, Íran

C-riðill: Þýskaland, Serbía, Ísland, Úrúgvæ

D-riðill: Svartfjallaland, Færeyjar, Spánn, Paragvæ

E-riðill: Holland, Austurríki, Argentína, Egyptaland

F-riðill: Frakkland, Pólland, Túnis, Kína

G-riðill: Svíþjóð, Brasilía, Tékkland, Kúba

H-riðill: Noregur, Angóla, Kórea, Kasakstan