ESB skammar Shein: Falskir af­slættir og villandi upp­lýsingar

Þetta kemur fram í frétt á vef Neytendastofu, þar sem segir að neytendayfirvöld í Belgíu, Frakklandi, Írlandi og Hollandi (CPC), með samræmingu frá framkvæmdastjórn ESB, rannsaki enn netverslunina. Óskað hafi verið eftir frekari upplýsingum frá Shein í þágu rannsóknarinnar. 

Netverslunin hefur verið harðlega gagnrýnd af umhverfissinnum en föt hennar hafa mælst eitruð og umhverfisfótspor þeirra er gríðarlegt. Jóhann Páll Jóhannsson umhverfisráðherra boðaði aðherðir gegn bæði Shein og Temu fyrr í mánuðinum. 

Rannsókn CPC nær til margvíslegra viðskiptahátta sem neytendur standa frammi fyrir þegar þeir versla á Shein. Þar má meðal annars nefna falska afslætti, þrýsting við sölu, rangar og villandi upplýsingar um lagalegan rétt og villandi sjálfbærnifullyrðingar. Í samantekt Neytendastofu kemur eftirfarandi fram. 

• Falskir afslættir: Að þykjast bjóða betri tilboð með því að sýna verðlækkanir sem eru ekki byggðar á raunverulegu fyrri verði.

• Þrýstingur við sölu: Að setja þrýsting á neytendur og kynna falska afslætti sem leiðir til þess að þeir taka skyndiákvörðun um kaup.

• Ófullnægjandi, rangar og villandi upplýsingar: Að birta ófullnægjandi og rangar upplýsingar um lagalegan rétt neytenda til að skila vöru og fá endurgreiðslur auk þess sem ekki er unnið úr skilum og endurgreiðslum í samræmi við réttindi neytenda.

• Villandi vörumerkingar: Að nota merkingar á vörur sem gefa til kynna að varan hafi sérstaka eiginleika þegar í raun er krafist viðkomandi eiginleika samkvæmt lögum.

• Villandi sjálfbærnifullyrðingar: Að veita rangar eða villandi upplýsingar um sjálfbærniávinning af vörum sínum.

• Faldar tengiliðaupplýsingar: Neytendur geta ekki auðveldlega haft samband við SHEIN vegna spurninga eða kvartana.

Hóta sektum ef Shein bætir ekki ráð sitt

Í frétt Neytendastofu kemur fram að CPC hafi að auki óskað eftir upplýsingum frá Shein til að meta samræmi þess við aðrar skyldur samkvæmt neytendaverndarlögum ESB, svo sem skyldu seljanda til að tryggja að vöruröðun, umsagnir og einkunnir séu ekki kynntar neytendum á villandi hátt.

Þá rannsaki CPC hvort Shein upplýsi neytendur um samningsaðila, sérstaklega ef vara er seld af öðrum seljanda í gegnum vefsvæði Shein. 

„Þessar aðgerðir eru viðbót við áframhaldandi aðgerðir framkvæmdastjórnarinnar á grundvelli laga um stafræna þjónustu (DSA). Báðar aðgerðir miða að því að tryggja öruggt og áreiðanlegt netumhverfi þar sem réttindi neytenda í Evrópu eru vernduð að fullu,“ segir í fréttinni. 

Loks kemur fram að Shein hafi nú einn mánuð til að svara athugasemdunum CPC og ESB og leggja til skuldbindingar um hvernig brugðist verði við. 

„Ef Shein bregst ekki við með viðeigandi hætti gæti komið til þess að gripið verði til framfylgdarráðstafana til að tryggja að farið sé að þeim. Þetta getur falið í sér að lagðar verði sektir á Shein á grundvelli árlegrar veltu félagsins í einstaka ríkjum innan Evrópu.“