Russell Brand lýsir yfir sak­leysi sínu

Réttarhöldin gegn honum eiga að hefjast þann 3. júní á næsta ári og áætlað er að þau muni standa yfir í rúman mánuð.

Hann hefur verið ákærður fyrir að hafa nauðgað konu í Bournemouth árið 1999. Fyrir að hafa ráðist kynferðislega á konu í Westminster í Lundúnum árið 2001. Fyrir að hafa nauðgað konu í sama hverfi árið 2004 og fyrir að hafa ráðist kynferðislega á konu í Lundúnum á árunum 2004 og 2005.

Fyrr í mánuðinum komst dómari að þeirri niðurstöðu að Brand, sem er 49 ára gamall, yrði ekki hnepptur í varðhald á meðan réttað er yfir honum en hann má ekki yfirgefa Bretland. Brand býr nú í Bandaríkjunum en mun nú þurfa að vera í Bretlandi þar til réttarhöldunum er lokið.

Sjá einnig: Brand fær að ganga laus á meðan réttað er yfir honum

Ásakanirnar gegn Brand, sem er 49 ára gamall, litu fyrst dagsins ljós í sameiginlegri rannsókn Sunday Times, The Times og Channel 4 sem birt var í september 2023.

Hann hefur tjáð sig um ásakanirnar en þá sagðist hann meðal annars hafa verið hálfviti, eiturlyfja- og kynlífsfíkill en aldrei hefði hann verið nauðgari.

Brand tjáði sig ekki við fréttamenn fyrir utan dómshúsið í Lundúnum.