Missa fata­markaðinn með flutningi Konu­kots í Ár­múla

Sóley Kristín Guðbjartsdóttir, starfsmaður Kotsins og Konukots, segir afar sorglegt að ekki sé hægt að halda rekstrinum áfram en loka þarf markaðnum vegna yfirvofandi flutnings Konukots í Ármúla 34.

„Það er ekki pláss fyrir okkur í Ármúla. Þetta er mikilvægur hluti fjáröflunar en við höfum ekki tök á að leigja húsnæði fyrir starfsemina. Þær eru í ástarsorg yfir þessu konurnar, að við séum að loka,“ segir Sóley.

Ódýrasti fatamarkaðurinn með notuð föt

Sóley opnaði markaðinn með samstarfskonu sinni, Sóleyju Lilju, fyrir ári og segir hafa gengið afar vel. Þær hafi tekið við miklu magni hvern laugardag og selt fyrir nokkur hundruð þúsund sem allt hafi svo runnið til Rótarinnar, sem rekur Konukot.

„Það hefur komið sér svo vel fyrir okkar skjólstæðinga að geta fengið föt og það verður mjög erfitt þegar það hættir. Við höfum verið að taka við fötum á laugardögum og það hafa verið ótrúlega flott og vel með farin föt. Við erum gífurlega þakklátar fyrir það. Fólk hefur áhuga á þessu verkefni og hefur talað um að þetta sé ódýrasti fatamarkaðurinn á Íslandi þar sem hægt er að fá notuð föt. Við erum svo þakklátar fyrir allan stuðninginn, þetta hefur verið ómetanlegt.“

Starfsmenn Konukots tóku allt rýmið í gegn fyrir opnun og héldu styrktartónleika í október.

„Við erum búnar að vera með mikið húllumhæ og ætluðum að vera með meira en svona er þetta víst,“ segir Sóley sem hefur starfað í Konukoti síðustu misseri en tekur næst við verkefnastjórn í Frú Ragnheiði samhliða störfum þar.

Markaðurinn verður opinn frá klukkan 12 í dag til 16 og verða allar vörur seldar á 300 krónur.

„Við erum með allskonar föt, á börn, karla og konur. Við erum líka með snyrtivörur og vörur frá Fangaverki og einhverja skartgripi en þetta er aðallega fatamarkaður,“ segir Sóley.

Til bráðabirgða í Ármúla

Þó svo að markaðurinn fái ekki pláss í nýju húsnæði segir Sóley frábært að Konukot fái nýtt og betra húsnæði. Í Ármúla er búið að innrétta gamalt skrifstofuhúsnæði þannig það geti hýst tólf skjólstæðinga Konukots auk þess sem þar er að finna tímabundið búsetuúrræði fyrir sex skjólstæðinga á 3. hæð hússins. 

„Þetta er miklu betra húsnæði. Það eru kostir og gallar við allt en húsnæðið og aðstaðan er miklu, miklu betri. Það er það sem skiptir höfuðmáli núna.“

Fram kom í viðtali við Kristínu I. Pálsdóttur, talskonu Rótarinnar, í mars á RÚV að um væri að ræða bráðabirgðahúsnæði fyrir Konukot en það sé áríðandi að finna starfseminni framtíðarhúsnæði.

Flutningurinn var kynntur í grenndarkynningu í febrúar og mars og samkvæmt fundargerð umhverfis- og skipulagsráðs Reykjavíkur bárust athugasemdir frá eiganda Smábitans, Sameind og lögfræðistofunni Lagarökum fyrir hönd fyrirtækisins Krosshólma. Öll mótmæla þau flutningi athvarfsins í Ármúla og lýsa yfir áhyggjum af umgengni, áreiti og mögulegri vímuefnaneyslu skjólstæðinga Konukots. Sameind og Krosshólmi reka bæði rannsóknarstofu í húsnæðinu við hlið en Smábitinn er veitingastaður. Í umsögn Sameindar er auk þess bent á að í næsta nágrenni, í Ármúla 28 til 30, er rekinn leikskóli. Það er leikskólinn Brákarborg.