„Þróttarar gefa ekkert eftir, er þeim ekki al­vara í þessu stríði?“

Þetta var spurningin sem Helena Ólafsdóttir, þáttastjórnandi Bestu markanna, spurði sérfræðinga þáttarins að eftir 2-0 sigur Þróttar Reykjavíkur á Þór/KA í 8. umferð Bestu deildar kvenna í knattspyrnu.

Sigurinn þýðir að Þróttur er sem stendur með þriggja stiga forystu á toppi deildarinnar. „Stríðið“ sem um er ræðir er svo titilbaráttan en eftir tap gegn FH unnu Íslandsmeistarar Breiðabliks 6-0 sigur á nýliðum FHL.

„Full alvara. Ég held að það hafi hentað þeim að koma bakdyramegin inn í þetta en nú er það náttúrulega búið,“ sagði sérfræðingurinn Þóra Björg Helgadóttir en fyrir mót var ekki talið líklegt að Þróttur myndi vera í titilbaráttu.

„Ég ætlaði að ausa lofi yfir Mollee Swift en Óli (Ólafur Kristjánsson, þjálfari Þróttar) var að skamma okkur fyrir að hrósa henni ekki nóg. Hún átti frábæran leik í dag. Hún á stóran þátt, á hinn bóginn fékk Þór/KA á sig tvö algjör skítamörk, Ljót yngri flokka mörk, eins og Jói (Jóhann Kristinn Gunnarsson, þjálfari Þórs/KA) kallaði þau. Það var bara rétt,“ bætti landsliðsmarkvörðurinn fyrrverandi við.

Umræðu Bestu markanna í heild sinni um leik Þróttar R. og Þórs/KA má sjá í spilaranum hér að neðan.