Segja skellt á Skattinn og að „of­beldi“ við­gangist í nefndinni

Hart var tekist á um veiðigjaldafrumvarpið á fundi Alþingis, líkt og svo margoft áður, þegar fundurinn hófst á umræðum um fundarstjórn forseta. Bergþór Ólason, þingflokksformaður Miðflokksins og nefndarmaður í atvinnuveganefnd, reið á vaðið og greindi frá því að að nefndarmenn í atvinnuveganefnd hefðu fengið boð um að aukafundur yrði hjá nefndinni á morgun, þar sem til stæði að nefndarálit vegna veiðigjalda yrði afgreitt úr nefndinni.

Í gærkvöldi hafi hins vegar borist upplýsingar frá Skattinum, sem hafi leitt í ljós skekkjur í útreikningum atvinnuvegaráðuneytisins sem liggi til grundvallar frumvarpinu.

„Það var óskað eftir því snemma í morgun að fá Skattinn fyrir nefndina, til að fara yfir þetta atriði og þetta misræmi. Því hefur verið hafnað,“ sagði Bergþór í pontu Alþingis við upphaf þingfundar klukkan 11.

Hann biðlaði til Þórunnar Sveinbjarnardóttur, forseta þingsins, að stuðla að því að gestakomur fyrir nefndina vegna veiðigjalda fengju að klárast, þar sem allt útlit væri fyrir að nægur tími væri til þingloka. Samkvæmt dagskrá þingsins ætti síðasti þingfundur að vera í dag.

Segir minnihlutann skæla og væla í þingforsetanum

Jón Gunnarsson Sjálfstæðisflokki á einnig sæti í atvinnuveganefnd, og kvaddi sér hljóðs.

„Maður upplifir vinnubrögðin í háttvirtri atvinnuveganefnd þannig að það sé ekki hægt að líkja því við neitt annað en algjört ofbeldi,“ sagði Jón. Fjöldi umsagnaraðila hafi ekki fengið að koma fyrir nefndina, til að mynda Byggðastofnun og fjármálafyrirtæki sem reiknað hafi áhrif veiðigjaldanna.

Þessi orð Jóns runnu ekki sérlega ljúflega niður hjá þingmönnum meirihlutans. Sigurjón Þórðarson, formaður atvinnuveganefndar kom upp í pontu til að bera af sér sakir, og sagði að tekið yrði tillit til athugasemda Skattsins.

„Að vera að kvarta hér og kveina yfir litlum gestakomum og að einhverjir fái ekki að koma hér með athugasemdir við þetta frumvarp, það er fáránlegt. Það hafa komið yfir 50 gestir á fundi nefndarinnar, og þetta skæl og væl hér í hæstvirtum forseta, það er bara ekki við hæfi. Það að fullorðnir menn skuli koma hér upp, þegar verið er að vanda til vinnubragða í þessu máli, það finnst mér ekki vera þeim til sóma,“ sagði Sigurjón.

Stuttu síðar kom Jón Gunnarsson öðru sinni upp í pontu og sagðist draga í efa orð Sigurjóns um að yfir 50 gestir hafi komið fyrir nefndina til að ræða veiðigjaldafrumvarpið. Kallað hafi verið eftir lista yfir alla gesti sem fengið hafi að koma með umsögn um málið á þriðjudag, en sá listi ekki enn fengist afhentur.

Síðar í umræðunum sagði hann einnig að orðanotkunin um ofbeldi hefði mögulega ekki verið rétt, og ástandinu innan nefndarinnar yrði best lýst sem lítilsvirðingu gagnvart þeim gestum sem komið hafi með athugasemdir við frumvarpið, sem ekki hafi verið hlustað á.

Ólýðræðislegt segir Sigmar

Sigmar Guðmundsson, þingflokksformaður Viðreisnar, var sömuleiðis ósáttur með umkvartanir minnihlutans, og gaf lítið fyrir þær.

 „Það er búið að taka inn fjölmarga gesti. Það er búið að taka tillit til fjölmargra sjónarmiða. Það er ekkert lýðræðislegt við það að minnihlutinn stöðvi mál meirihlutans,“ sagði Sigmar.

Ítrekað hefur verið fjallað um að fyrsta umræða þingsins um veiðigjaldafrumvarpið sé sú lengsta sinnar tegundar síðan skrifstofa Alþingis hóf að halda utan um slíka tölfræði.

Meirihlutinn hefur ítrekað sagt stjórnarandstöðuna hafa viðhaft málþóf í fyrstu umræðu, en á móti hefur minnihlutinn sagt að ræðutími í fyrstu umræðu sé takmarkaður, og því ómögulegt að viðhafa eiginlegt málþóf þar sem mál eru rædd út í hið óendanlega.