Mat­reiðslu­bókin hlaut eftir­sótt alþjóð­leg verð­laun

Gourmand verðlaunahátíðin var sett á laggirnar árið 1995 og hefur veitt verðlaun fyrir framúrskarandi matreiðslu og vínbækur, og matreiðsluþætti, í þrjátíu ár. Þátttakendur á hverju ári koma frá rúmlega tvö hundruð löndum.

Á heimasíðu þeirra segir að talað sé um Gourmand verðlaunin sem óskarsverðlaun matreiðsluheimsins.

Víkingaöldin gædd lífi

Í tilkynningu er greint frá því að íslenska bókin Veislumatur landnámsaldar hafi gert sér lítið fyrir og unnið fyrstu verðlaun í flokki Norrænnar matargerðar.

Höfundar bókarinnar eru Kristbjörn Helgi Björnsson sagnfræðingur, Karl Peterson ljósmyndari og Úlfar Finnbjörnsson, hinn þekkti matreiðslumeistari, og voru þeir með bókina í vinnslu í fimm ár.

„Í bókinni, sem heitir Feast of the Vikings á ensku, rannsakar Kristbjörn Helgi gaumgæfilega þær heimildir sem Íslendingasögurnar og fornleifafræðin segir okkur um matarvenjur á víkingaöld, þar sem hann skoðaði meðal annars allar tilvísanir í mat í Íslenidngasögunum og hvað uppgreftir á ruslahaugum víkingatímas á Norðurlöndunum segja okkur um matarvenjur þess tíma. Úlfar fékk svo niðurstöður Kristbjörns í hendurnar og setur fram tilgátuuppskrifitir þar sem hann notar einungis hráefni þess tíma,“ segir í tilkynningu.

Umsögn dómnefndar er eftirfarandi:

„Þakka ykkur fyrir, Kristbjörn Helgi Björnsson, Úlfar Finnbjörnsson og Karl Petersson, fyrir að gæða víkingaöldina lífi í Veislumatur landnámsaldar – bókin er heillandi blanda af sögu, frumlegum uppskriftum og glæsilegri framsetningu. Ítarlegar rannsóknir Kristbjörns, djörf nálgun á matreiðslu og einstaklega fallegar myndir gera bókina bæði upplýsandi og girnilega. Ógleymanlegt ferðalag aftur í tímann, til íslenska eldhússins fyrr á tímum!“

Arndís Lilja Guðmundsdóttir sá um útlit bókarinnar og Ingunn Snædal þýddi textann yfir á ensku. Drápa gaf bókina út í nóvember 2023.