Bæta ekki fall­varnir við veginn: „Þetta er ei­lífur slagur“

Þetta kemur fram í svari Eyjólfs Ármannssonar innviðaráðherra við fyrirspurn Ingveldar Önnu Sigurðardóttur, varaþingmanns Sjálfstæðisflokksins og íbúa í Varmahlíð. Þar segir að fjármunum í minni umferðaröryggisaðgerðir sé forgangsraðað árlega og sem stendur séu aðgerðir við Holtshnúp ekki á áætlun. Aðrir vegakaflar njóti forgangs.

Banaslys varð við veginn í mars þegar grjóthrun varð úr Steinafjalli við Holtshnúp. Erlendur ferðamaður lést í slysinu og tveir aðrir slösuðust minniháttar.

Í svarinu kemur þó fram að þessi staður hafi oft komið til álita, ásamt öðrum sambærilegum stöðum, þegar skoðað hefur verið að koma upp vörnum.

„Ýmsar útfærslur eða lausnir hafa í þessu samhengi verið ræddar án þess að hægt sé að slá því föstu að til sé lausn sem eyðir alfarið hættu af völdum grjóthruns, önnur en að færa veginn. Á vegakerfinu eru margir kaflar sem kalla á sérstakar öryggisaðgerðir og við þessa vinnu hafa aðrir kaflar raðast framar í forgangsröðun fram að þessu.“

Þar kemur einnig fram að á landsvísu hafi, síðustu 25 árin, verið skráð 96 tilvik þar sem snjór eða grjót hefur hrunið á ökutæki, þar af sex þar sem voru skráð meiðsl á fólki.

Skrá ekki endilega hrun

Vegagerðin skráir samkvæmt svarinu ekki sérstaklega hreinsun á vegi sama hvort það er eftir grjót eða aðra aðskotahluti en víða í vegakerfinu er að finna staði þar sem grjóthrun verður við veg. Ef tilkynning kemur til þjónustustöðvar Vegagerðarinnar eða ef starfsmenn verða sjálfir varir við grjót á vegi eða við veg er farið strax í hreinsun. 

Samkvæmt svari ráðherra er því ekki víst að öll tilfelli séu skráð og því ekki endilega til tölfræði um það. Á síðustu árum hafi skráningar verið um 30 til 60 á ári. Þeir staðir þar sem helst er talin hætta á skriðum eða grjóthruni eru skráðir á kort sem sýnir einnig aðra vá á vegum. Kortið má sjá að ofan en þar má einnig sjá að grjótvarnir eru aðeins á fimm stöðum á landinu. Á þremur stöðum á Norðausturlandi, einum á Suðurnesjum og einum á Austurlandi.

Ráðherra hefur beðið Vegagerðina að hefja formlega skráningu á tilkynningum vegna grjóthruns á vegum og samkvæmt svari ráðherra hefur Vegagerðin verið í samtali við Veðurstofuna um sameiginlega skráningu um grjóthrun og skriðuföll en því ferli er ekki lokið.

Verði að grípa til aðgerða

Ingveldur segir svar ráðherra ekki glæsilegt og stöðuna óásættanlega. Hún segir nauðsynlegt að grípa til aðgerða.

„Bændur hafa fjarlægt steina við þennan veg, stundum tilkynnt, stundum ekki - þrátt fyrir það, þá verður að grípa til aðgerða þarna fyrir íbúa og ferðamenn sem keyra þennan veg daglega.“

Í samtali við fréttastofu segir Ingveldur að hún ætli ekki að láta þarna staðar numið. Fari hún aftur inn á þing sem varaþingmaður ætli hún að halda áfram að spyrja út í þetta og þá til dæmis sérstaklega um það í hvað fjármagn sem hefur verið útdeilt í „minni umferðaröryggisaðgerðir“ hafi farið í.

Ingveldur segir að frá því í mars hafi ekki orðið frekara grjóthrun en hún hafi þó alltaf varann á þegar hún ekur um svæðið, og þá sérstaklega í myrkri. Grjóthrunið sé algengast á haustin og vorin í leysingum.

„Mamma keyrði á stein nákvæmlega þarna fyrir um þremur árum, það var í myrkri,“ segir Ingveldur. Þá hafi hún verulegar áhyggjur af skólabílnum sem aki þarna um allt að sex sinnum á dag.

Hún segir umferð hafa margfaldast um veginn síðustu ár og það verði að grípa til aðgerða. Hún bindi vonir við það að hægt verið að setja fjármagn í fallvarnir við veginn á næsta ári.

„Þetta er eilífur slagur.“