Málaði loftið í lit sem minnir á skólajógúrt

Vala Matt hitti fagurkerana tvo á heimilum þeirra í Íslandi í dag. Linda stendur í stórum breytingum á nýju heimili sínu eftir að hafa flutt úr nýuppgerðri íbúð á Njálsgötu. Hún segir Völu frá verkefnum sínum. 

„Ég er rosalega mikið fyrir að endurnýta. Ég kaupi mikið notað sjálf og held að það sé besta leiðin til að vera ekki að menga jafn mikið. Kaupa nýtt og gamalt í bland og bara breyta. Oft þurfum við bara að mála loftið, taka eitthvað í burtu, færa sófann og þá erum við komin með alveg nýtt rými,“ segir Linda.

Hún talar mikið fyrir þeim kosti að mála loftin á heimilum, en íbúð hennar við Njálsgötu vakti athygli í Húsum og híbýlum nýlega þar sem hún hafði málað loftin í stofunni og svefnherberginu. 

„Við máluðum dökkt loft í svefnherberginu, í svona djúpum, ríkum, bleikum, brúnum lit. Svona eins og gamla skólajógúrtið, jarðarberja og súkkulaði. Og fólk tók eftir því, minnti það á það. Af því að litir vekja upp minningar hjá okkur.“

Innlit til Lindu og Elísabetar má sjá hér að neðan.