Tíu Ís­lendingar í Íran og fjórir í Ísrael

Þetta kemur fram í skriflegu svari utanríkisráðuneytisins við fyrirspurn fréttastofu. Stríð er yfirvofandi milli Íran og Ísrael eftir árásir ríkjanna tveggja á víxl undanfarna daga og nú síðast loftárásir Bandaríkjanna á Íran. 

Ráðuneytið veit til þess að allavega þrír íslenskir ríkisborgarar hafi yfirgefið Ísrael eftir að átökin brutust út fyrir rúmri viku síðan.

Þá segir í svarinu að borgaraþjónusta utanríkisráðuneytisins hafi verið í samskiptum við Íslendingana í bæði Ísrael og Íran sem og ættingja þeirra hér á landi. Ráðuneytið fylgist náið með opnum leiðum af svæðinu og eigi í miklu og reglubundnu samtali við Norðurlöndin sem og önnur helstu samstarfsríki, en á þessari stundu séu ekki skipulagðir brottflutningar frá Íran.