Kvartanir borist vegna aflýstra flug­ferða

Af 20.200 flugferðum Icelandair frá og með maí og til og með september hefur aðeins 62 flugferðum verið aflýst. Ekki fengust nákvæmar tölur fyrir sama tímabil hjá flugfélaginu Play en stundvísi félagsins mældist 86,4 prósent á fyrri hluta árs.

Greint var frá töluverðum breytingum hjá Play á dögunum. Flugferðum til og frá Norður-Ameríku verður hætt frá og með október og munu fjórar flugvélar sinna flugi til og frá Íslandi í stað sjö. Áfangastöðum í Evrópu frá Íslandi verður fækkað.

Samkvæmt upplýsingum frá Isavia er fjöldi aflýstra flugferða til og frá Keflavíkurflugvelli svipaður og síðustu ár.

Neytendasamtökunum hafa borist kvartanir vegna flugferða sem hefur verið aflýst. Formaður samtakanna brýnir fyrir fólki að vera meðvitað um rétt sinn þegar svo ber undir.

„Þú átt rétt að velja annað hvort að fá endurgreitt í sömu mynt og þú greiddir. En þú átt líka rétt á því að velja um það að flugfélagið komi þér á þann áfangastað eða eins nálægt í tíma og hægt er og jafnvel með öðru flugfélagi án þess að þú greiðir aukakostnað fyrir það. Þetta er eitthvað sem að flugfélög eru ekki að auglýsa mikið því miður,“ segir Breki Karlsson, formaður Neytendasamtakanna, í kvöldfréttum Sýnar.

Ekki öll félögin láti vita

Það eigi við um öll flugfélög innan Evrópu. Breka þykir það miður að flugfélög eigi það til að upplýsa ekki neytendur um rétt sinn.

„Flugfélögin bjóða þér endurgreiðslu eða jafnvel inneign í einhverju formi en segja þér ekki frá því að þú eigir þennan rétt að geta komist á áfangastað með öðru flugfélagi.“

Hann minnir jafnframt á að ef flug er fellt niður með skömmum fyrirvara geta farþegar átt rétt á bótum. Hann hvetur fólk til að nýta vef samtakanna eða Samgöngustofu til að leita réttar síns.

„Ef þú færð ekki svör nægilega fljótt eða flugfélagið bregst ekki við með réttum hætti þá geturðu sent þeim tilkynningu um að þú munir sjá um þetta mál og senda svo reikninginn til þeirra. Sem sagt lagt út fyrir flugfarinu og svo geturðu innheimt það síðarmeir. Ef þú nýtir ekki réttinn þá er hann tapaður.“