Ís­lands­meistarar krýndir á Ís­landsmótinu í hesta­í­þróttum

Í fjórgangi fullorðinna var það Ásmundur Ernir Snorrason á Hlökk frá Strandarhöfði sem stóð uppi sem sigurvegari með einkunnina 8,20. Rétt á eftir honum kom Jakob Svavar Sigurðsson á Skarpi frá Kýrholti með 8,07. Ásmundur var þarna að vinna sinn þriðja Íslandsmeistaratitil á mótinu.

Í fimmgangi stóð Þorgeir Ólafsson á Aþenu frá Þjóðólfshaga uppi sem sigurvegari en þau fengu 7,76 í einkunn. Teitur Árnason á Leyni frá Garðshorni á Þelamörk varð í 2.sæti með 7,71 í einkunn og Glódís Rún Sigurðardóttir á Snillingi frá Íbishóli í þriðja sætinu með 7,62. Hörkukeppni og allir knapar með yfir sjö í einkunn.

Þá var komið að slaktaumatölti en þar stóð Helga Una Björnsdóttir upp úr með frábæra einkunn, 8,63. Virkilega mikil gæði í úrslitunum í slaktaumatölti en Helga reið á Ósk frá Stað.

Að lokum var keppt í tölti sem var lokagreinin á Brávöllum. Til að komast í úrslit þurftu keppendur að vera með 8,30 í einkunn og því mjög sterkir knapar sem riðu til úrslita. Íslandsmeistarinn í ár, Jakob Svavar Sigurðsson á Skarpi frá Kýrholti með 9,33 í einkunn og fagnaði hann að vonum innilega.